Toshkentda mart oyida ijaraga beriladigan uy-joy narxlari pasaydi

Iqtisodiy tadqiqotlar va islohotlar markazi ko‘chmas mulk bozoridagi talab o‘zgarishlari bo‘yicha navbatdagi sharhni e’lon qildi.

Qayd etilishicha, 2023 yil 1-choragi natijalariga ko‘ra sotuvlar 2,7 foizga o‘sib, shartnomalar soni 61 mingdan oshdi.

Mart oyida poytaxtning aksariyat tumanlarida ijaraga beriladigan uy-joy narxlarining pasayishi kuzatildi. Toshkent shahrida ijaraning o‘rtacha narxi 1 kvadrat metr uchun 9,2 dollarni tashkil etib, 7 foizga pasaydi.

Tumanlar kesimida ijaraning 1 kvadrat metri uchun eng yuqori narxlari poytaxtimizning Shayxontohur (11,9 dollar), Yakkasaroy (11,8 dollar) va Mirobod (12 dollar) tumanlarida qayd etildi.

Ma’lum qilinishicha, O‘zbekistonda ikkilamchi bozorda uy-joy narxi o‘sish sur’ati sekinlashdi. Yanvar oyida 1 kvadrat metr uchun uy-joy narxi o‘rtacha o‘sishi – 0,9 foiz, fevral oyida – 4,5 foiz, mart oyida – 0,2 foiz bo‘lgan. 

Toshkent shahar ikkilamchi bozorida oy davomida narxlar o‘sish sur’ati biroz sekinlashdi va mart oyida 2,8 foizni, yanvar oyida 1,9 foizni, fevral oyida esa 3,8 foizni tashkil etdi.