O‘zbekistonda maktabgacha ta’limni rivojlantirish xalqaro mintaqaviy markazi ochiladi

Maktabgacha va maktab ta’limi vazirining birinchi o‘rinbosari – Maktabgacha ta’lim agentligi direktori Agrippina Shin hamda YuNESKOning O‘zbekistondagi vakolatxonasi rahbari Sara Noshadi, Parijdan tashrif buyurgan YuNESKO tadqiqot missiyasi o‘rtasida uchrashuv bo‘lib o‘tdi.

Uchrashuvda tomonlar Toshkentda o‘tkazilgan «Kichik yoshdagi bolalarga g‘amxo‘rlik va ta’lim berish bo‘yicha Butunjahon konferensiyasi» doirasida O‘zbekiston prezidentining YuNESKO shafeligida 2-toifali mintaqaviy markazni ochish bo‘yicha bergan taklifini amalga oshirishga qaratilgan masalalarni ko‘rib chiqdi.

Shuningdek, tomonlar jahon konferensiyasi davomida YuNESKOga a’zo davlatlar tomonidan qabul qilingan YuNESKO Toshkent deklaratsiyasiga kiritilgan shartlarni amalga oshirish yuzasidan fikr almashdi.

Agrippina Shin tomonidan O‘zbekistonda tashkil etilishi kutilayotgan 2-toifali mintaqaviy markazga maktabgacha ta’lim bilan birgalikda, maktab va oliy ta’limni rivojlantirish masalalari kiritilishi lozimligi to‘g‘risidagi taklif taqdim etildi.

Yig‘ilishning asosiy qismi hududiy markazni ochish bo‘yicha kelgusidagi harakatlarni muhokama qilishga qaratildi. Mazkur markazni ochish uchun texnik-huquqiy shart-sharoitlarni tayyorlash bo‘yicha vazifalar belgilab olindi.