Krasnodar o‘lkasida Su-25 quladi. Uchuvchi halok bo‘ldi

17 iyul kuni mahalliy vaqt bilan soat 15:00 da Yeysk shahri yaqinida Azov dengiziga Su-25 rusumli shturmovik qulab tushdi. Bu haqda Krasnodar o‘lkasi operativ shtabi telegram-kanalida xabar berilgan.

«Mavjud ma’lumotlarga ko‘ra, pilot katapulta qilingan, qutqaruvchilar uni darhol evakuatsiya qilishgan. Samolyot qulashi sababini aniqlash uchun voqea joyida mudofaa vazirligi va maxsus xizmatlar mutaxassislari ish olib borishmoqda», — deyiladi xabarda.

Janubiy harbiy okrug bu ma’lumotni tasdiqlab, Su-25 o‘quv parvozini amalga oshirayotgan bo‘lganini xabar qildi. TASS agentligi xabariga ko‘ra, halokatga dvigatel ishlamay qolgani sabab bo‘lgan.

Agentlik o‘z manbasiga tayangan holda xabar berishicha, shturmovik uchuvchisini suvdan olib chiqib, jonlantirishga harakat qilishgan. Baza telegram-kanali xabariga ko‘ra, u suvga qo‘nish vaqtida oyog‘ini sindirib olgan va parashyut arqonlariga o‘ralashib qolgan. Soat 16:00 atrofida Baza va «112» manbalari u halok bo‘lganini xabar qildi. Ko‘p o‘tmay Krasnodar o‘lkasi Yeysk rayoni rahbari Roman Bublik uchuvchining o‘limini tasdiqladi.

«112» xabarida yozilishicha, Su-25 sohildan 2 km masofada qulagan. Baza xabariga ko‘ra, dengizning bu qismi chuqur bo‘lmagani uchun samolyot parchalari suv yuzasidan ham ko‘rinib turibdi.

• O‘tgan yil oktyabrida ham Yeyskda o‘quv parvozi chog‘ida Su-34 rusumli qiruvchi-bombardimonchi samolyot halokatga uchragandi. U havoga ko‘tarilish vaqtida qulagan va ko‘p qavatli uyga urilgandi. Natijada 16 kishi halok bo‘lgan, yana 20 ga yaqin kishi jarohatlangandi. Uchuvchilar muvaffaqiyatli katapulta qilingandi.
• Tergov qo‘mitasi halokat sababi bo‘yicha texnik nosozlikni asosiy versiya sifatida keltirgan. Jinoyat kodeksining 351-moddasi bo‘yicha (parvoz xavfsizligi va unga tayyorlanish qoidalari buzilishi) jinoiy ish qo‘zg‘atilgan.