O‘zbekiston Gurjiston portlari hududida terminallar qurishi mumkin

O‘zbekiston Transport vazirligi ma’lumotiga ko‘ra, tashrif davomida delegatsiya Gurjiston dengiz transporti agentligi direktori Aleksai Ahvlediani bilan ikki tomonlama hamkorlikni rivojlantirish masalasida uchrashuv o‘tkazdi.

Transport vazirligi vakillari Poti, Batumi, Anakliya, Poti erkin iqtisodiy zonasi hamda Sarpi chegara nazorat o‘tkazish punkti faoliyati bilan tanishdi.

Gurjiston iqtisodiyot va barqaror rivojlanish vazirining o‘rinbosari Guram Guramishvili bilan uchrashuv o‘tkazildi. Unda O‘zbekiston eksport-import yuklari tashuvlarini amalga oshirishda ushbu davlatning Poti va Batumi portlari mavjud infratuzilmasidan samarali foydalanish, O‘zbekiston biznesi vakillari tomonidan Gurjiston portlari hududida terminallarni qurish bo‘yicha bildirilgan takliflar muhokama etildi.