«Inter»da jahon chempioni, Messining vorisi APLga yo‘l oldi. So‘nggi transfer xabarlari

Transferlar oynasi yopilishi arafasida ham qator jiddiy transferlar amalga oshirilmoqda. 1 sentabr, juma kuni esa futbol muxlislarini dedlayn kutmoqda.

«Barsa» vingeri APLga yo‘l olmoqda

O‘z vaqtida Lionel Messining vorisi sifatida ko‘rilgan, bugungi kunga kelib «Barselona»ning asosiy tarkibidagi o‘rnini yo‘qotib qo‘ygan Ansu Fati faoliyatini Angliyada davom ettiradi. Avvaliga ushbu futbolchi uchun «Tottenhem» asosiy da’vogar bo‘lib turgan va uni 2024 yil iyuniga qadar ijaraga olishi kutilayotgandi. 

31 avgust kuni chiqqan ma’lumotlarga ko‘ra, 20 yoshli hujumchi Angliyaning boshqa bir jamoasi «Brayton» safiga o‘tadi. Yevropadagi asosiy insayder Fabritsio Romano bu haqda Here We Go! iborasini qo‘llagan holda xabar bergan. Bu esa kelishuv amalga oshishi ehtimoli 99,9 foiz degani.

Fati o‘tgan mavsumda «Barsa» safida barcha turnirlar doirasidagi 51 o‘yinda qatnashgan, 10 gol urib, to‘rt golga uzatma bergan.

«Arsenal» yosh forvardini «Monako»ga sotdi

«Arsenal» hujumchisi Folarin Balogun «Monako» a’zosiga aylandi. Amerikalik 22 yoshli futbolchi yangi klubi bilan besh yillik shartnoma imzoladi (2028 yil iyuniga qadar). Avvalroq Fabritsio Romano «Arsenal» Balogun uchun bonuslar bilan birga 40 mln yevro olishini yozgandi. Kelishuvga keyingi sotuvdan ulush to‘g‘risidagi band ham kiritilgan – agar forvard shartnomasi tugashidan oldin boshqa klubga sotilsa, «Arsenal» 17,5 foiz ulushga ega bo‘ladi. Balogun o‘tgan mavsumda Fransiya chempionatidagi boshqa bir jamoa «Reyms»da ijara asosida o‘ynab, barcha turnirlar doirasidagi 39 o‘yinda 22 gol urgan va uchta golli uzatmaga hammualliflik qilgandi.

«Liverpul» maydon markazini kuchaytirmoqda

APLdagi asosiy insayderlardan biri David Ornshteyn xabar berdi: «Liverpul» «Bavariya» bilan yarimhimoyachi Rayan Gravenberh transferini muhokama qilmoqda. 21 yoshli niderlandiyalik ham faoliyatini «Enfild»da davom ettirishni istaydi. Myunxenliklar uning o‘rniga boshqa futbolchi olishga ulgurish uchun transfer imkon qadar tezroq amalga oshishini xohlamoqda. Gravenberh o‘tgan mavsumda «Bavariya» safida Bundesliganing 24 o‘yinida maydonga tushgan. Transfermarkt uning taxminiy narxini 30 mln yevro deb baholagan. Jurnalist Kris Baskombaning ma’lumotiga ko‘ra, «Liverpul» Gravenberh uchun 40 mln yevro taklif qilgan.

«Bavariya» Gravenberh o‘rniga futbolchi topgan

«Bavariya» vaqtni yo‘qotmayapti va Gravenberh o‘rniga o‘rinbosar qidirmoqda. Variantlar orasida: Joau Palinya («Fulhem»), Erik Dayyer («Tottenhem») va Trevo Chaloba («Chelsi»). Myunxenliklar uchun hozirda asosiy variant – Palinya. Jurnalist Kristian Falk ma’lumotiga ko‘ra, nemislar 28 yoshli portugal uchun 60 mln yevro atrofida mablag‘ to‘lashga tayyor. Bu kelishuv amalga oshishi uchun esa «Bavariya» avval Gravenberhni sotishi kerak. Jurnalist Kerri Hau Palinyaga myunxenliklar jamoasi bosh murabbiyi Tomas Tuxel shaxsan qiziqish bildirayotganini qayd etgan.

«Chelsi» «Siti» tarbiyalanuvchisini olib ketmoqda

Fabritsio Romano xabariga ko‘ra, «Chelsi» «Manchester Siti» bilan yarimhimoyachi Koul Palmer transferi bo‘yicha kelishuvga erishgan. Uning ma’lumotiga ko‘ra, londonliklar 21 yoshli futbolchi uchun 46 mln yevro to‘laydi. Yana 6 mln yevro bonuslar sifatida o‘tkazib berishi ko‘zda tutilgan. Palmer yaqin vaqtlar ichida yangi jamoasi uchun tibbiy ko‘rikdan o‘tadi. Koul – «Siti» tarbiyalanuvchisi hisoblanadi, u asosiy jamoada 2021 yil iyulida debyut qilgan va Riyoz Mahrez ketganidan keyin asosiy tarkibda uning o‘rnini egallashi kutilayotgandi. Ammo «Siti» bu pozitsiya uchun 60 mln yevroga «Renn»dan belgiyalik vinger Jyeremi Dokuni sotib oldi.

Lukaku rasman Mourinio jamoasida

Romelu Lukaku rasman «Roma» a’zosiga aylandi. Italyanlar klubi va «Chelsi» bir yillik ijara shartnomasi bo‘yicha kelishuvga erishgan. Qiziqarli detal: «Roma» xo‘jayini Den Fridkin ushbu belgiyalik forvard mingan samolyotni shaxsan o‘zi boshqarib, Rimga olib ketgan. O‘tgan mavsumda Lukaku ijara asosida «Inter»da o‘ynagandi va barcha turnirlar doirasida 37 o‘yinda maydonga tushib, 14 gol urgan, yetti golga uzatma bergan. Uning «Chelsi» bilan shartnomasi muddati 2026 yil iyuniga qadar amal qiladi. Agar u «Roma»da yaxshi o‘ynab ketsa, mavsum yakunida transfer huquqi to‘g‘ri sotib olinishi ham mumkin.

«Siti» De Bryuynega o‘rinbosar topdi

«Manchester Siti» Mateus Nunes transferi bo‘yicha «Vulverhempton» bilan kelishuvga erishdi, buni Fabritsio Romano tasdiqlagan. Tomonlar so‘nggi detallarni muhokama qilmoqda. Tez orada transfer to‘g‘risida rasman e’lon qilinadi. Nunes 2022 yil avgustida «Sporting»dan 45 mln yevro evaziga «Vulverhempton»ga o‘tgandi. Ushbu portugaliyalik yarimhimoyachi o‘tgan mavsumda barcha turnirlar doirasida 37 o‘yinda maydonga tushib, bir gol urgan va bir golga uzatma bergan. Nunes «Siti»da og‘ir jarohat olgan Kevin De Bryuyne o‘rnini egallaydi. Belgiyalik yarimhimoyachi safga keyingi yilgacha qaytmaydi.

«Inter» top-himoyachini safga qo‘shib oldi

Fransiyalik himoyachi Benjamen Pavar rasman «Inter» a’zosiga aylandi. Fabritsio Romano ma’lumotiga ko‘ra, transfer uchun 30 mln yevro to‘langan, shuningdek 2 mln yevro miqdoridagi bonuslar va’da qilingan. Futbolchi yangi klubi bilan 2028 yil iyuniga qadar amal qiluvchi shartnoma tuzgan. Pavar 2019 yil yozidan buyon «Bavariya» safida o‘ynab kelayotgandi. U myunxenliklar uchun jami 163 o‘yinda maydonga tushib, 12 gol urgan va 12 golga uzatma bergan. Benjamen «Bavariya» bilan 2019/2020 yillar mavsumida YeChL g‘olibi bo‘lgan, 2020 yilda UYeFA Superkubogini qo‘lga kiritgan, klublar o‘rtasidagi jahon chempionatida g‘alaba qozongan, shuningdek to‘rt marta Germaniya chempioni bo‘lgan. Endi esa Milan jamoatchiligini xushnud qilishda davom etadi.

«Barsa» ballast futbolchidan qutulmoqda

Here We Go! Fabritsio Romano Kleman Langle «Aston Villa»ga o‘tayotganini tasdiqladi. Fransuz himoyachisi yana bir mavsum ijara asosida Angliya klubida o‘ynaydi. Kelishuv mavsum oxirida futbolchining transfer huquqini sotib olish majburiyatini olishini ko‘zda tutmagan. Birminghemliklar Langlening maoshining 75 foiz qismini to‘laydi. Ushbu himoyachisi «Barsa» bosh murabbiyi Xavining rejalaridan o‘rin olmagan va o‘tgan mavsumda ham «Tottenhem»da ijara asosida o‘ynagandi.

Futbolchilar «PSJ»ga o‘tish uchun ham isyon qilishadi

Kolo Muani Bundesligada o‘tgan mavsum kashfiyotlaridan biriga aylangandi. Fransiyalik himoyachi mavsumning eng yaxshi to‘purarlariga yetib olish uchun bitta gol yetmadi – «RB Leypsig»dagi Nkunku va «Verder»dagi Fyullkrug 16 tadan gol urishgandi (ammo ularning penaltidan urgan gollari soni Kolo Muanikidan ko‘proq).

Avvaliga u Levandovski ketganidan keyin amalda markaziy forvardsiz qolgan «Bavariya»ga o‘tishi haqida gapirishgandi, ammo myunxenliklar Harri Keynni olishdi va yoz oxiriga kelib «PSJ» varianti haqida ko‘proq gapira boshlashdi.

«Ayntraxt» hujumchisi Randal Kolo Muani OAVga bergan intervyusida «PSJ»ga o‘tishni istayotganini aytdi. Frankfurt jamoasi sport direktori Markus Kryoshe futbolchi Parij klubiga transfer bo‘lish uchun jamoa mashg‘ulotlarini boykot qilgani haqida xabar berdi. Randal «PSJ»ga o‘tish uchun obro‘siga putur yetishiga ham rozi. Transfermarkt Kolo Muanini 80 mln yevroga baholagan. «Ayntraxt» esa parijliklarning shuncha miqdordagi taklifini rad etgan va 100 mln yevro so‘ragandi. Bu vaqtda esa Fabritsio Romano «PSJ» boshqa bir klub bilan ham yangi futbolchi transferi borasida kelishib olganini xabar qilmoqda. Unga ko‘ra, «Lion» forvardi Bredli Barkola uchun 45 mln yevro to‘lanadi, yana 5 mln yevro miqdorida bonus ko‘zda tutilgan. Futbolchi allaqachon yangi klubi uchun tibbiy ko‘rikdan o‘tish jarayonini boshlagan.