Noturar joyni rasmiylashtirishdan avval yashovchilarni ro‘yxatdan chiqarish talab etiladi

Vazirlar Mahkamasining «Fuqarolarni ro‘yxatga qo‘yish tartibini takomillashtirish munosabati bilan hukumat ayrim qarorlariga o‘zgartirish va qo‘shimchalar kiritish to‘g‘risida»gi qarori qabul qilindi.

Hujjat bilan quyidagilarga o‘zgartirishlar kiritilmoqda: 

Bino va inshootlarning ixtisoslashishini o‘zgartirish, qayta qurish, rekonstruksiya qilish hamda o‘z hududida qo‘shimcha bino va inshootlar qurishni loyihalashtirishga ruxsatnoma berish bo‘yicha davlat xizmatlari ko‘rsatishning ma’muriy reglamentiga;
 
Ko‘chmas mulkka bo‘lgan huquqlarni davlat ro‘yxatidan o‘tkazish bo‘yicha davlat xizmatlari ko‘rsatishning ma’muriy reglamentiga.

O‘zgartirishlarga muvofiq:

turar joy noturar joy toifasiga o‘tkazilayotganda u yerda vaqtinchalik yoki doimiy ro‘yxatdan o‘tkazilgan barcha shaxslar mazkur joy kadastr organlarida qayta rasmiylashtirilguniga qadar ro‘yxatdan chiqarilishi lozim;

fuqarolar ro‘yxatdan chiqarilganliklari haqida ma’lumot «Raqamli hukumat» platformasi orqali tekshiriladi;

obektning ixtisoslashishini o‘zgartirish bo‘yicha ruxsatnomaga o‘zgartirilgan obektga biriktirilgan yer uchastkasining chegara sxemasi ilova qilinadi.