Sog‘liqni saqlash vaziriga yangi o‘rinbosarlar tayinlandi

“Davlat boshqaruvi” kanali xabariga ko‘ra, Farrux Sharipov, Farhod Toshpo‘latov va Olim Omonov vazir o‘rinbosarlari sifatida ish boshladi.

Farrux Sharipov 1969 yilda Samarqand viloyatida tug‘ilgan. 1993 yilda Samarqand davlat tibbiyot institutini, 2010 yilda esa Toshkent davlat iqtisodiyot universitetini tamomlagan. U 2021 yildan Davlat tibbiy sug‘urtasi jamg‘armasi ijro etuvchi direktori sifatida ishlab kelayotgandi.

Farhod Toshpo‘latov 1983 yil Toshkent shahrida tug‘ilgan. 2004 yil O‘zbekiston davlat jahon tillari universiteti, 2005 yil Toshkent davlat iqtisodiyot universiteti qoshidagi ixtisoslashtirilgan Oliy biznes maktabini tamomlagan. U 2021 yildan buyon «O‘zagrosug‘urta» aksiyadorlik jamiyati boshqaruvi raisining o‘rinbosari bo‘lib ishlab kelgan.

Olim Omonov bungacha “Chorvoq” turistik rekreatsion zonasi direksiyasi” davlat unitar korxonasi direktori edi. Undan avval u Vazirlar Mahkamasi Hududlarni kompleks rivojlantirish, kommunikatsiyalar, qurilish va uy-joy kommunal xo‘jaligi masalalari kotibiyatida mas’ul lavozimda ishlagan.

O‘z navbatida, Ulug‘bek Sobirov boshqa ishga o‘tishi munosabati bilan sog‘liqni saqlash vazirining o‘rinbosari lavozimidan ozod etildi.