“Toshkent shahrida o‘quv mashg‘ulotlari o‘tkazilmoqda” – poytaxt IIBB

Ijtimoiy tarmoqlarda Toshkent shahar sudi binosiga bomba qo‘yib ketilgani haqida xabarlar tarqaldi. E’lon qilingan videolavhada sud binosi oldida FVV xodimlari yurganini ko‘rish mumkin.

Toshkent shahar IIBB holatga izoh berdi. Ma’lum qilinishicha, poytaxtda joylashgan ayrim sud binolarida o‘quv mashg‘ulotlari o‘tkazilgan.

“Toshkent shahar sudi, IIBB, Milliy Gvardiya va boshqa huquqni muhofaza qiluvchi organ xodimlari bilan hamkorlikda o‘quv mashg‘ulotlari o‘tkazilmoqda. Bu kabi o‘quv mashg‘ulotlari shahrimizda tinchlik va osoyishtalikni ta’minlash, shuningdek strategik obektlarda xavfsizlik qoidalariga rioya etilishini tekshirish maqsadida rejali ravishda amalga oshirilmoqda.

Hurmatli fuqarolar! Xavfsizlik qoidalariga rioya etishingizni va xavotirga berilmasligingizni hamda vaqtinchalik noqulayliklar uchun uzr so‘raymiz. Barcha harakatlar shahrimizning tinchlik va osoyishtaligini ta’minlash maqsadida o‘tkazilmoqda”, deyiladi poytaxt IIBB xabarida.