Qorabog‘lik etnik armanlar Armanistonga jo‘nab ketyapti

Qorabog‘dan minglab qochqinlar o‘tgan hafta Bokuning bo‘lginchi Ozarboyjon hududi ustidan qozonilgan g‘alabasini sharaflash maqsadida o‘tkazilgan Ozarboyjon va Turkiya rahbarlari sammiti oldidan Armanistonga jo‘nab ketdi. 25 sentabr, dushanba kungi holatga ko‘ra, Qorabog‘dan Armanistonga kamida 4850 kishi yetib kelgan, deb xabar berdi Yerevan hukumati.

Undan atigi yetti soat oldin qochqinlar soni 2900 dan sal ko‘proq ekani xabar qilingandi. Ularning qariyb 1100 nafari davlat hisobidan joylashtirildi, yana 1000 nafarga yaqini esa mustaqil joy topdi. Armanistonning Syunik viloyati Goris shahrida yangi kelganlarni qabul qilish markazi tashkil etildi. Boshpana mahalliy teatr hududida joylashgan.

Armanlarning chiqib ketishi kutilyapti

Bir kun avval o‘zini Tog‘li Qorabog‘ respublikasi deb e’lon qilgan «hokimiyat maslahatchisi» David Babayan Qorabog‘dan etnik armanlarning ommaviy chiqib ketishi kutilayotganini aytdi. «Mintaqada 120 ming arman Ozarboyjon tarkibida yashashni istamaydi, ularning 99,9 foizi tarixiy yerlarini tark etishni ma’qul ko‘radi», - dedi u. 

Armaniston bosh vaziri Nikol Pashinyan Ozarboyjonning Tog‘li Qorabog‘da bo‘lginchilarni tezda mag‘lub etishida Rossiyani aybladi. Yerevanda Pashinyan va butun hukumat iste’fosini talab qilgan ommaviy namoyishlar to‘xtamayapti. Namoyishchilar Armaniston Qorabog‘ga harbiy harakatlar davomida yordam bermaganidan norozi.