Foto: Jazirama va qurg‘oqchilik tufayli Amazonkada baliq va delfinlar halok bo‘lmoqda

Dunyodagi eng yirik daryo sohillarida yashab kelgan va asosan baliqchilik bilan shug‘ullangan aholi og‘ir ahvolda qolgan. Faqat suv transporti orqali borish mumkin bo‘lgan aholi yashash manzillari tashqi dunyodan uzilib qolgan.

Janubiy Amerikadagi dunyoning eng yirik havzaga ega daryosi bo‘lmish Amazonka butun mintaqa hayotiga katta ta’sir ko‘rsatadi. Haddan tashqari issiq harorat va qurg‘oqchilik tufayli Amazonkaning o‘zi, uning irmoqlari va ushbu daryo bilan bog‘liq ko‘llardagi suv sathi kuzatuvlar tarixidagi eng past darajaga tushdi. Sayozlik va suv harorati oshishi Tefe ko‘lida baliqlar va yuzlab delfinlar yoppasiga nobud bo‘lishiga olib keldi. Suv sathi pasayishi daryoda kemalar qatnovini ham qiyinlashtirmoqda, Amazonka yoqasida yashab kelgan va asosiy daromad manbayi baliqchilik bo‘lgan odamlar esa og‘ir ahvolda qolgan. Quyida dunyodagi eng yirik daryodagi qurg‘oqchilik va sayozlik oqibatlari aks etgan suratlar. Olimlarga ko‘ra Amazonkada ro‘y berayotgan holat, katta ehtimol bilan, inson omili tufayli ro‘y berayotgan global iqlim o‘zgarishi ko‘rinishlaridan biri sanaladi.