Qariyb 6 oy davom etadigan xalqaro ko‘rgazmada O‘zbekiston pavilyoni ish boshladi

«Yashil sahro, yanada yaxshi atrof-muhit» shiori ostida o‘tkazilayotgan “EKSPO Doha-2023” butunjahon ko‘rgazmasida ishtirokchi davlatlar milliy pavilyonlarining rasmiy ochilish marosimi bo‘lib o‘tdi. Bu haqda Kun.uz’ga Qishloq xo‘jaligi vazirligi matbuot xizmati xabar berdi.

Doha shahridagi Al Bidda parkida tashkil qilingan ko‘rgazmada ishtirokchi davlatlar millionlab tashrif buyuruvchilarga o‘z imkoniyat va tashabbuslarini namoyish qilishi kutilyapti. 

O‘zbekiston ko‘rgazmada o‘z salohiyatini zamonaviy qishloq xo‘jaligi, texnologiya va innovatsiyalar, ekologik xabardorlik va barqaror rivojlanish mavzularida namoyish etishi belgilangan. Ko‘rgazmada xalqaro, madaniy va oilaviy zonalar, dehqon bozori hamda biologik xilma-xillik muzeyi sayyohlar ixtiyorida bo‘ladi.

Milliy pavilyonda mikroko‘katlar, chorva uchun yashillikdan iborat ozuqa bazasi, bir yilda bir necha marotaba hosil berishi mumkin bo‘lgan gibrid navlar, bog‘dorchilik va meva-sabzavotchilikdagi so‘nggi seleksiya navlari namoyish etilmoqda. Ko‘rgazma uchun 112 turdagi 5 tonna eksportbop va sarxil mahsulotlar olib borilgan. Ayniqsa, poliz ekinlari, dukkakli, quritilgan va ho‘l mevalar, sabzavotlar, ko‘katlar, keng turdagi sanoat mahsulotlari namoyishiga alohida o‘rin berilgan.  

Shu bilan birga ilmiy-tadqiqot institutlar tomonidan paxtachilik, g‘allachilik, urug‘chilik, “In vitro” kabi yangi ishlanmalar ham namoyish qilinyapti.

“EKSPO Doha-2023” butunjahon ko‘rgazmasi 2024 yilning 28 martigacha davom etadi. 

Oldinroq Qatarga davlat tashrifi bilan borgan prezident Shavkat Mirziyoyev “EKSPO Doha-2023” butunjahon ko‘rgazmasining ochilishida ishtirok etgandi.