Aziz Voitov qishloq xo‘jaligi vaziri lavozimidan ketdi

U bu lavozimda 2022 yil avgustidan buyon ishlab kelayotgandi.

Foto: Kun.uz

Aziz Voitov qishloq xo‘jaligi vaziri lavozimini tark etdi. Bu haqdagi ma’lumotni Kun.uz manbasi tasdiqladi.

Ayni vaqtda uning ketishi sababi ma’lum emas. Bu iste’fo so‘nggi vaqtlarda fermerlarning paxta narxlari bo‘yicha shikoyatlari ko‘payishi ortidan ro‘y bermoqda.

Aziz Voitov 1980 yilda tug‘ilgan, Toshkent moliya institutini «Soliq va soliqqa tortish» mutaxassisligi bo‘yicha bitirgan (2001) hamda Oliy ishbilarmonlik maktabida «Biznes boshqaruvi» bo‘yicha tahsil olgan (2010).

Voitov o‘z vaqtida «O‘zbekiston sanoat-qurilish banki» ATB boshqaruvi raisi lavozimida ishlagan. 2020 yil martidan investitsiyalar va tashqi savdo vazirining (o‘sha vaqtda Sardor Umrzoqov) birinchi o‘rinbosari lavozimida ish boshlagan, 2022 yil avgust oyidan buyon qishloq xo‘jaligi vaziri lavozimida ishlab kelayotgandi.

Avvalroq ijtimoiy tarmoqlarda Toshkent viloyati hokimi Zoyir Mirzayev qishloq xo‘jaligi vaziri etib tayinlanayotgani haqida xabarlar tarqalgandi. Ammo hokimlik bu haqiqatga to‘g‘ri kelmasligini bildirib, xabarlarni rad etgan.

#qishloq xo‘jaligi #Aziz Voitov