Koreyada o‘zbekistonlik rahbar kadrlar uchun malaka oshirish dasturlari tashkil etiladi

Davlat xizmatini rivojlantirish agentligi direktorining birinchi o‘rinbosari Otabek Hasanov boshchiligidagi O‘zbekiston delegatsiyasining Janubiy Koreyaga amaliy tashrifi o‘z nihoyasiga yetdi, deb xabar bermoqda «Dunyo».

Tashrif davomida Koreya Respublikasi Personalni boshqarish vaziri Kim Sin Xo bilan muloqot tashkil etildi. Muzokaralarda inson resurslarini boshqarish va davlat xizmatini rivojlantirish sohalarida hamkorlik istiqbollari muhokama qilindi.

Uchrashuv yakunida tomonlar o‘zaro anglashuv memorandumini imzolashdi. Unga ko‘ra, inson resurslarini boshqarish jarayonini raqamlashtirish, davlat xizmati va kompetensiyalarni baholash masalalari bo‘yicha tajriba almashish, rahbar kadrlar uchun Janubiy Koreyada malaka oshirish va stajirovka dasturlarini tashkil etishga qaratilgan qo‘shma loyihalar amalga oshiriladi.

Bundan tashqari, Otabek Hasanov 25 ta mamlakatning davlat xizmatida inson resurslari masalalari bo‘yicha mas’ul rahbarlari qatorida "Raqamli texnologiyalar rivojlanishining davlat inson resurslari sohasiga ta’siri" mavzusida HR-yetakchilar forumida ishtirok etdi.