Bryanskdagi otishma: maktabni qo‘riqlagan xususiy kompaniya rahbari ushlandi

Bryansk gimnaziyalaridan birida sodir bo‘lgan shov-shuvli otishma natijasida ikki bola halok bo‘ldi va yana besh nafari yaralandi, politsiya ushbu ta’lim muassasasini qo‘riqlagan «Agenstva Ekskalibur» direktori va xodimini qo‘lga oldi, deb xabar qilmoqda Rossiya OAV 8 dekabr, juma kuni huquq-tartibot idoralaridagi manbalarga tayanib.

Moskvalik tergovchilar agentlik ofisida, shuningdek, uning direktori Sergey Poddubniyning kvartirasida tintuv o‘tkazdi. Unga va otishma kuni ishlagan xodimga nisbatan xavfsizlik talablariga javob bermaydigan xizmat ko‘rsatish holati bo‘yicha ish ochilgan. Manbalarga ko‘ra, otishma sodir bo‘lgan 5-sonli gimnaziyada metall detektor o‘rnatilmagan. Mash xabar berishicha, ramka plastik o‘ramga o‘ralgan va elektr tarmog‘iga ulanmagan bo‘lgan. 

Bir kun avval qo‘lga olingan maktabda otishma sodir etgan o‘quvchi qizning otasiga nisbatan qurolni ehtiyotsizlik bilan saqlash moddasi bo‘yicha ish ochildi. 

Otishma avvalroq sodir bo‘lishi mumkin edi 

Bryanskdagi gimnaziyada maktab o‘quvchilariga qarata o‘q uzgan o‘quvchi qurolni otasidan olganini 8 dekabr kuni Rossiya Ichki ishlar vazirligi tasdiqladi. «Voyaga yetmagan qiz ishlatgan ov miltig‘i otasiga tegishli bo‘lib, qonuniy ravishda uyda saqlangan», — deyiladi xabarda. 

Gulag Telegram-kanaliga ko‘ra, qiz otishmani avvalroq amalga oshirishi mumkin edi – u avgust oyida maktabga qurol bilan kelmoqchi bo‘lgan, biroq o‘shanda seyfda qurol yo‘q edi. U butun sentabr oyini ma’lum chatlarda o‘tkazgan, portlovchi qurilma yasash bo‘yicha qo‘llanmalarni o‘rgangan va o‘z kundaligiga sinfdoshlarini o‘ldirishni orzu qilganini yozgan. Dekabr oyida, mojaroli vaziyat yanada keskinlashganida, qiz otasi qurolni seyfga solib qo‘yishini kutgan va shundan keyin uni maktabga olib kelgan.

Gimnaziyadagi otishma 

Gimnaziyaga kelgan qiz bir necha marta o‘q uzgan va keyin o‘z joniga qasd qilgan. Politsiya ma’lumotlariga ko‘ra, hodisa natijasida besh kishi jarohatlangan, bir maktab o‘quvchisi vafot etgan. 

Otishmada yaralangan va davolanish uchun Moskvaga evakuatsiya qilingan o‘smirlarning ahvoli og‘ir, ulardan biri operatsiya qilinmoqda, dedi Rossiya sog‘liqni saqlash vaziri yordamchisi Aleksey Kuznetsov.