O‘zbekiston sog‘lom turmush tarzini targ‘ib etishda Indoneziya tajribasini o‘rganyapti

«Dunyo» xabariga ko‘ra, onlayn uchrashuv davomida Indoneziya tomoniga O‘zbekiston Sog‘lom turmush tarzi va fitnes assotsiatsiyasi faoliyati to‘g‘risida ma’lumot berildi. Yaqinda tashkil etilgan mazkur assotsiatsiyasining asosiy vazifasi aholi o‘rtasida sog‘lom turmush tarzini mustahkamlash, sog‘lom ovqatlanish tamoyillarini keng targ‘ib qilish, barcha yoshdagi fuqarolar o‘rtasida jismoniy qobiliyatni shakllantirish ekanligi ta’kidlandi.

Muloqot chog‘ida tomonlar O‘zbekiston Sog‘lom turmush tarzi va fitnes assotsiatsiyasi va Indoneziya fitnes murabbiylari uyushmasi o‘rtasida hamkorlikni yo‘lga qo‘yish masalalarini ham muhokama qildi.

Qo‘shma dasturlar ishlab chiqish, fitnes va sog‘lom turmush tarzini shakllantirishga qaratilgan standartlar va sertifikatlash tizimlarini yo‘lga qo‘yish, metodologik qo‘llanmalar ishlab chiqish, murabbiylar tayyorlash sohasida tajriba almashish, shuningdek, seminarlar, mahorat darslari, o‘quv-mashg‘ulot yig‘inlarini birgalikda tashkil etishga alohida e’tibor qaratildi.

Uchrashuv yakunida O‘zbekistonda fitnes va sog‘lom turmush tarzini ommalashtirishga qaratilgan sharoitlar bilan yaqindan tanishish va bu sohada ikki tomonlama hamkorlikni yo‘lga qo‘yish maqsadida ushbu uyushma vakillarining O‘zbekistonga amaliy safarini uyushtirish yuzasidan kelishib olindi.