Grossi Eronni yadroviy dasturini shaffofroq qilishga chaqirdi

Atom energiyasi xalqaro agentligi (AEXA) rahbari Rafael Grossi Eronni yadroviy dasturi ustidan xalqaro monitoringni yaxshilash uchun «tezkor va aniq qadamlar»ga chaqirdi. «Men natijalarni xohlayman va ularni tezda ko‘rishni xohlayman», - deya 7 may, seshanba kuni Eronga ikki kunlik tashrifi yakunlanganidan so‘ng Grossining so‘zlaridan iqtibos keltirgan dpa.

AEXA rahbari Eron tashqi ishlar vaziri Husayn Amir Abdullohiyon va Eron Atom energiyasi tashkiloti (EAET) rahbari Muhammad Eslomiy bilan muzokaralar o‘tkazdi. Grossi 2023 yil mart oyidagi AEXA va Tehronning Islom Respublikasi yadroviy inshootlarini kuzatish imkoniyatlarini kengaytirishni nazarda tutuvchi qo‘shma bayonotini kuchaytirish bo‘yicha bir qator qadamlarni taklif qildi. Eslomiy muzokaralarni «konstruktiv va istiqbolli» deb atadi. Biroq, hech qanday aniq harakatlar kelishib olinmadi.

«Hozirgi holat (Eron yadroviy dasturi bo‘yicha Tehron bilan hamkorlik) meni umuman qoniqtirmaydi», - deya ta’kidladi Grossi. Uning so‘zlariga ko‘ra, Eron hukumati xalqaro inspektorlarning o‘z yadroviy obektlarida ishlashiga ruxsat berilganini G‘arb sanksiyalari rejimining yumshatilgani bilan bog‘lashda davom etmoqda, bu esa siyosiy asoratlarni keltirib chiqaradi.

AEXA rahbari: Eron atom bombasini yaratishiga «haftalar qoldi»

Aprel oyida Rafael Grossi DW nashriga Eron atom bombasini yaratish uchun yetarli darajada boyitilgan uranga ega bo‘lishiga «oylar emas, haftalar» qolganini aytdi. Biroq, bu Tehronda allaqachon bunday bomba bor, degani emas, dedi u. Grossi, shuningdek, AEXA o‘zining eronlik hamkasblari faoliyatini «kerakli darajada ko‘rish imkoniga» ega emasligidan shikoyat qildi.