Markaziy istirohat bog‘larida sport va ko‘ngilochar o‘q otish maydonlari tashkil etiladi

Prezidentning “O‘q otish sport turini yanada rivojlantirish va ommalashtirish chora-tadbirlari to‘g‘risida”gi qarori loyihasi e’lon qilindi.

Loyiha bilan:

• o‘q otish sport turlarini rivojlantirishning asosiy yo‘nalishlarini belgilash;
• fuqaroviy va sport qurollari muomalasi, xavfsizligi hamda ularga qonuniy egalik qilish bo‘yicha pulli asosda o‘quv kurslarini tashkil etish;
• hududlardagi markaziy istirohat bog‘larida sport va ko‘ngilochar o‘q otish maydonlarini tashkil etish;
• 2025-2026 o‘quv yilidan boshlab O‘zbekiston davlat jismoniy tarbiya va sport universitetida “O‘q otish va stenddan otish” bakalavriat ta’lim yo‘nalishini ochish;
• O‘zbekiston mudofaasiga ko‘maklashuvchi “Vatanparvar” tashkilotining tegishli sport bazalari o‘q otish sport turlari bo‘yicha amaliy mashg‘ulotlarni o‘tkazish uchun asosiy baza sifatida biriktirish ko‘zda tutilgan.

O‘q otish sport turlari bo‘yicha yuqori mahoratli sportchilar tayyorlash tizimini yo‘lga qo‘yish maqsadida:

• 2024-2025 o‘quv yilidan boshlab umumta’lim maktablarida chaqiruvga qadar boshlang‘ich tayyorgarlik fani o‘quv dasturlari doirasida “O‘qotar va pnevmatik sport qurollarining taktik-texnik tavsiflari” amaliy mashg‘ulotlari kiritish;
• o‘qotar va pnevmatik sport qurollarining taktik-texnik tavsiflari bo‘yicha amaliy mashg‘ulotlar o‘tkazilishida umumta’lim maktablariga o‘zlari biriktirilgan harbiy qism, muassasalar, harbiy poligonlarning doimiy joylashuv joyidagi o‘quv-moddiy bazasidan foydalanishlariga ruxsat etish;
• 2026 yildan boshlab har yili an’anaviy tarzda “Markaziy Osiyo ochiq chempionati”, harbiylashtirilgan va huquqni muhofaza qiluvchi tashkilotlar xodimlari o‘rtasida o‘q otish sport turlari bo‘yicha “Mergan” kubogini hamda “O‘zbekiston chempionati” musobaqalarini o‘tkazib borish ko‘zda tutilmoqda.