Qozog‘istonda xotinini o‘ldirgan sobiq vazirga nisbatan hukm o‘zgarishsiz qoldirildi

Bishimbayev xotini Saltanat Nukenovani o‘ldirganlikda aybdor deb topilib, 13 may kuni 24 yil muddatga ozodlikdan mahrum etilgan, shundan keyin hukm ustidan shikoyat bergan edi. Uning advokati endilikda Oliy sudga shikoyat kiritilishini bildirdi.

Apellyatsiya sudi sobiq vazirdan tashqari, uning qarindoshi Baxitjon Boyjonovga berilgan jazoni ham o‘zgarishsiz qoldirdi. Boyjonov o‘ta og‘ir jinoyatni yashirishda aybdor deb topilib, 4 yilga ozodlikdan mahrum etilgan.

2016 yil may–dekabr oylarida Qozog‘iston Milliy iqtisodiyot vazirligini boshqargan Quvondiq Bishimbayev Ostonadagi “Gastrosentr” majmuasida xotinini kaltaklab o‘ldirganlikda gumonlanib 2023 yil noyabrda hibsga olingan edi. Oradan 2 kun o‘tib, “Gastrosentr” direktori Baxitjon Boyjonov ham qamoqqa olingan.

Bu jinoyat Qozog‘istonda katta rezonansga sabab bo‘ldi va uning fonida mamlakatda oiladagi zo‘ravonlikka qarshi choralarni kuchaytirish bo‘yicha yangi qonun qabul qilindi.

Ma’lumot uchun, Bishimbayev bundan avval korrupsion jinoyat uchun ham sudlangan. U 2018 yil mart oyida pora olishda aybdor deb topilib, 10 yilga ozodlikdan mahrum etilgan. Lekin 2019 yil fevralida u davlat rahbari tomonidan afv etilib, o‘sha yilning oktyabrida muddatidan oldin shartli ozodlikka chiqarilgan.