Rossiyada Qrimdagi portlashda ayblangan shaxs 18 yilga qamaldi

Rossiya Federatsiyasining Janubiy okrug harbiy sudi Sergey Yerjovni Qrimning Yalta yaqinidagi Koreiz qishlog‘ida 2023 yilda gaz quvurida sodir bo‘lgan portlashda ayblab, 18 yilga ozodlikdan mahrum qildi. Bu haqda sud matbuot xizmati xabar berdi.

Xabarda ta’kidlanganidek, Rossiyaning Ukrainaga keng miqyosli hujumi boshlangandan so‘ng, Yerjov Dnipropetrovsk viloyati hududida bo‘lganida Ukraina Xavfsizlik xizmati («SBU») xodimi bilan «aloqaga kirgan». Uning rahbarligi ostida u go‘yoki «qo‘lbola portlovchi qurilmalarni yasash bo‘yicha keng qamrovli bilim, amaliy ko‘nikmalarga ega bo‘lgan».

Shundan so‘ng, sud versiyasiga ko‘ra, 2023 yilning yozida o‘sha paytda Yaltaga ko‘chib o‘tgan Sergey Yerjov go‘yoki portlovchi moslama yasagan va 23 iyun kuni gaz quvurining bir qismini portlatib, «katta moddiy zarar yetkazgan, shuningdek, o‘lim xavfini yaratgan». 

Sud matbuot xizmati xabariga ko‘ra, Yerjov jazo muddatining dastlabki to‘rt yilini qamoqda, qolganini esa qattiq tartibli koloniyada o‘tkazadi. Bundan tashqari, unga 500 ming rubl miqdorida jarima belgilandi. 

«FSB» ayblanuvchining hibsga olingani haqida o‘tgan yilning avgust oyida xabar berib, uning so‘roq paytidagi videosini ko‘rsatgan edi. Yozuvda Yerjov aybini tan olgan.