Yerlarni qishloq xo‘jaligida qayta foydalanishga kiritish uchun qarzlar ajratiladi

Vazirlar Mahkamasining “Yer maydonlarini yangidan o‘zlashtirish va qishloq xo‘jaligida qayta foydalanishga kiritishda davlat tomonidan amalga oshiriladigan chora-tadbirlar to‘g‘risidagi nizomni tasdiqlash haqida”gi qarori qabul qilindi. Shuningdek hujjatda belgilangan chora-tadbirlarni moliyalashtirish tartibi tasdiqlandi.

Qo‘shimcha yer maydonlarini yangidan o‘zlashtirish va muomalaga qaytarish uchun quyidagilar ajratiladi:

• Qishloq xo‘jaligini davlat tomonidan qo‘llab-quvvatlash jamg‘armasi hisobidan 200 mlrd so‘m miqdorida foizsiz qarz mablag‘lari;
• 2024 yil uchun Davlat budjeti parametrlarida sug‘oriladigan yer maydonlari va qishloq xo‘jaligida foydalanilmayotgan cho‘l hududidagi yerlarni qayta foydalanishga kiritish uchun rejalashtirilgan 100 mlrd so‘m;
• xalqaro moliya institutlarining grant mablag‘lari;
• ushbu tadbirlarni amalga oshirish uchun yetishmaydigan mablag‘larning bir qismi - Qoraqalpog‘iston budjeti va viloyatlar mahalliy budjetlarining qo‘shimcha manbalari hisobidan.

Ushbu mablag‘lar quyidagi vazifalarni hal qilish uchun yo‘naltiriladi:

• vertikal sug‘orish quduqlarini burg‘ilash, nasos agregatlarini montaj qilish va ishga tushirish;
• daryolar, kanallar va boshqa suv havzalaridan suv olish uchun zarur vositalarni xarid qilish va o‘rnatish;
• sug‘orish (ariqlar, kanallar) va kollektor tizimlarini qurish va rekonstruksiya qilish;
• yangi o‘zlashtirilayotgan va qishloq xo‘jaligida qayta foydalanilayotgan yer uchastkalarini lazer qurilmali tekislash agregatlari bilan tekislash.

Nizom quyidagi tartiblarni belgilaydi:

• yangidan o‘zlashtirilishi va qishloq xo‘jaligida qayta foydalanishga kiritilishi lozim bo‘lgan yer uchastkalarining manzilli ro‘yxatini shakllantirish;
• yerlarni o‘zlashtirish va qishloq xo‘jaligida qayta foydalanish bo‘yicha tadbirlarni moliyalashtirish;
• ushbu yer uchastkalarini qabul qilish;
• yerlarni o‘zlashtirish va qishloq xo‘jaligida qayta foydalanish bo‘yicha tadbirlarga ajratiladigan mablag‘lardan maqsadli foydalanilishi ustidan nazorat.