«Auksion o‘yinlari» orqali Bo‘stonliqdan yer olib berish uchun 1,5 million dollar talab qilgan fuqaro ushlandi

Huquqni muhofaza qiluvchi idoralar Toshkent viloyatida o‘tkazgan tezkor tadbirlar davomida davlat zaxirasidagi 5 gektarga yaqin yer maydonlarini «mansabdor tanishlari» va «auksion o‘yinlari» orqali olib berishni va’da qilgan shaxslar ushlandi.

Foto: Videodan kadr

26 avgust kuni IIV Tezkor qidiruv departamenti DXX, Bosh prokuratura iqtisodiy jinoyatlarga qarshi kurashish departamenti bilan hamkorlikda Toshkent viloyati Qibray tumanida tezkor tadbir o‘tkazdi. Bu haqda Ichki ishlar vazirligi matbuot xizmati xabar berdi.

Tezkor tadbirda Bo‘stonliq tumanidagi Yakkatut mahallasidan 3,5 gektar hokimlik zaxirasidagi yer maydonini «auksion o‘yinlari» yordamida olib berishni va’da qilgan shaxs ushlandi. U hujjatlarni rasmiylashtirib berish evaziga 1,5 million dollar talab qilib, shundan bo‘nak sifatida 50 ming dollar olgan vaqtida ushlangan.

Yana bir holatda Qibray tumanida yashovchi ikki fuqaro Bo‘stonliq tumani davlat zaxirasidagi 1,2 gektar qishloq xo‘jaligi ekin yer maydonini 384 ming dollarga sotishga kelishgan. Ular yuqori lavozimda ishlaydigan tanishlari orqali yerni rasmiylashtirib berishni va’da qilib, 20 ming dollarni bo‘nak tarzida olgan vaqtida ashyoviy dalillar bilan qo‘lga olingan.

IIVning ma’lum qilishicha, har ikki holat bo‘yicha jinoyat ishi qo‘zg‘atilgan va tergov harakatlari olib borilmoqda.