Lohurda O‘zbekiston savdo uyi tashkil etiladi

Pokiston savdo vaziri Jam Kamol Xon boshchiligidagi ushbu mamlakat delegatsiyasi amaliy tashrif bilan O‘zbekistonda bo‘ldi.

Foto: Investitsiyalar, sanoat va savdo vazirligi

Pokiston delegatsiyasi tashrif davomida Toshkent shahrida o‘tkazilgan Savdo-iqtisodiy va ilmiy-texnikaviy hamkorlik bo‘yicha Hukumatlararo komissiyaning 9-yig‘ilishida, shuningdek, O‘zbekiston-Pokiston biznes-forumida ishtirok edi. Unda ikki tomonlama qator kelishuvlarga erishildi.

Shuningdek, "Imtiyozli savdo" bitimi doirasida mahsulotlar ro‘yxatini kengaytirish bo‘yicha savdo vaziri o‘rinbosarlari darajasida qo‘shma ishchi guruh tashkil etildi. Toshkent shahrida Pokistonning Diners Group kompaniyasi tomonidan Savdo uyini ochish va kelgusida Lohur shahrida O‘zbekiston savdo uyini tashkil etish bo‘yicha tashkiliy masalalar muhokama qilindi.

2025 yil mart oyida Islomobod yoki Lohur shaharlarida Hukumatlararo qo‘shma komissiyaning 10-yig‘ilishini, Made in Uzbekistan ko‘rgazmasini va biznes-forum o‘tkazish istiqbollari ko‘rib chiqildi.

Tomonlar transport-logistika, savdo-iqtisodiy, investitsiya yo‘nalishida O‘zbekiston-Pokiston munosabatlarini yangi bosqichga olib chiqish muhimligini ta’kidladilar.