Qozog‘iston halokatga uchragan AZAL samolyoti «qora quti»larini Braziliyaga jo‘natadi

ICAO tavsiyalari hamda Ozarboyjon va Rossiya aviatsiya ma’muriyatlari bilan maslahatlashuvlarni inobatga olgan holda, Qozog‘iston shunday qarorga keldi.

Foto: news.ru / Global Look Press

Qozog‘iston Oqtov yaqinida halokatga uchragan Azerbaijan Airlines samolyotining «qora quti»larini Braziliyaning Aviatsiya hodisalarini tekshirish va oldini olish markaziga (CENIPA) yuboradi. Bu haqda Qozog‘iston transport vazirligi xabar berdi.

«Chikago konvensiyasining 13-ilovasi standartlariga muvofiq, tekshiruv o‘tkazayotgan davlat bort registratorlarining o‘qilishini ta’minlaydi va «qora quti»larni o‘qish va shifrini ochish uchun mamlakatni tanlash to‘g‘risida qaror qabul qiladi», deyiladi xabarda.

Qozog‘iston ushbu konvensiyani 1992 yilda ratifikatsiya qilgan va Xalqaro fuqaro aviatsiyasi tashkiloti (ICAO) a’zosi hisoblanadi.

«Yuqoridagi hujjat asosida, shuningdek, ICAO tavsiyalari hamda Ozarboyjon va Rossiya aviatsiya ma’muriyatlari bilan maslahatlashuvlarni inobatga olgan holda, Qozog‘iston transport vaziri Marat Qoraboyev boshchiligidagi Aviatsiya hodisalarini tekshirish komissiyasi, parvozni qayd qiluvchi qurilmalarni (qora qutilarni) Embraer samolyoti ishlab chiqarilgan mamlakat Braziliyaning Aviatsiya hodisalarini tekshirish va oldini olish markaziga (CENIPA) yuborish to‘g‘risida qaror qabul qilindi», deyiladi Qozog‘iston transport vazirligi xabarida.

Tayyorlagan Сардор Юсупов

#Rossiya #Qozog‘iston #aviahalokat #Ozarboyjon

25 dekabr tongida Bokudan Grozniyga uchgan samolyot yo‘nalishini o‘zgartirib, Qozog‘istonning Oqtov shahri aeroporti yaqinida avariyaviy qo‘nishni amalga oshirdi. Aviahalokatda 38 kishi halok bo‘ldi.