Guantanamo qamoqxonasi ochilganidan beri hibsda saqlangan Tunis fuqarosi ozod etildi

Uzoq yillar davomida Guantanamo qamoqxonasida saqlangan tunislik Rida bin Saloh al-Yazidi ozod etilib, vataniga qaytarildi. Bu haqda Pentagon e’lon qilgan press-relizga tayanib BBC xabar berdi.

Al-Yazidi ushbu qamoqxonada ochilgan vaqtdan — 2002 yilning yanvaridan beri dastlabki ayblov e’lon qilinmagan holda hibsda saqlangan. 59 yoshli erkak qamoqxonada olingan eng mashhur suratlardan birida tasvirlangan: unda mahbuslar Camp X-Ray’dagi ochiq osmon ostida tiz cho‘kkan holda o‘tiribdi. Ushbu surat AQShning terrorizmda gumon qilinganlarni hibsga olish borasidagi ziddiyatli siyosati ramziga aylangan.

Al-Yazididan tashqari yana uch kishi Keniya va Malayziyaga jo‘natilgan. Jo Bayden administratsiyasi Guantanamodagi mahbuslar sonini bosqichma-bosqich qisqartirmoqda: u prezidentlik lavozimiga o‘tirganida qamoqxonada 40 nafar mahbus saqlangan bo‘lsa, hozirda ularning soni 26 nafarni tashkil etmoqda. Mahbuslarning yarmidan ortig‘i boshqa joyga o‘tkazilish huquqiga ega.

Guantanamo qamoqxonasi Kuba janubi-sharqidagi AQSh harbiy-dengiz bazasida joylashgan bo‘lib, u 2001 yil 11 sentabr teraktlaridan keyin «terrorizmga qarshi kurash» doirasida qurilgan. Qamoqxona ishga tushganidan beri xalqaro hamjamiyatning keskin tanqidlariga uchrab keladi va u inson huquqlarining buzilishi ramziga aylangan.

22 yil davomida qamoqxonada jami 780 nafarga yaqin mahbus saqlangan. Pentagon al-Yazidining Tunisga qaytarilish jarayoniga oid batafsil ma’lumotlarga to‘xtalmagan. New York Times’ning yozishicha, Yazidiga ayblov e’lon qilinmagan, uning boshqa joyga ko‘chirilishi esa 10 yildan ortiqroq vaqt oldin ma’qullangan.