NATO Boltiq dengizidagi suvosti infratuzilmasini qo‘riqlashga 10 ga yaqin kema yuboradi

Eron joriy hafta oxirida Boltiq dengizidagi muhim ahamiyatga ega obektlarni o‘nga yaqin kema yordamida qo‘riqlashga kirishadi, deb xabar bermoqda Yle.

«NATO hozirda Boltiq dengizida xizmat qilayotgan, shuningdek, bevosita NATO davlatlari tomonidan jo‘natilgan kemalarni yuboradi. Umumiy hisobda ularning soni o‘nga yaqinlashadi va kemalar aprelga qadar dengizda qoladi», — deyiladi xabarda.

Qayd etilishicha, kemalar energiya va ma’lumotlarni uzatishga mo‘ljallangan kabellar atrofida joylashtiriladi. Ular asosan tiyib turuvchi omil sifatida harakat qiladi. Ta’kidlanishicha, NATO xalqaro suvlarda boshqa davlatlarning kemalari harakatini bloklab qo‘ya olmaydi.

Bundan tashqari, Fin ko‘rfazi oldingidek Estoniya va Finlandiya kemalari tomonidan qo‘riqlanadi.

Dekabr oxirida NATO Boltiq dengizidagi harbiy ishtirokini kuchaytirishini ma’lum qilgandi. Bunga Estoniya va Finlandiya o‘rtasidagi Estlink 2 suvosti elektr kabeliga zarar yetkazilgani sabab bo‘lgan.

Hongkong bayrog‘i ostida suzuvchi Xin Xin Tiang 2 kemasi uzilish sodir bo‘lgan joy yaqinida payqalgan. Yle media-kompaniyasining ma’lumotlariga ko‘ra, yana bir kema — Estlink 2 kabeli hududida Kuk orollari bayrog‘i ostida Sankt-Peterburgdan Misrga yo‘l olgan va hodisa aniqlanganda sezilarli darajada sekinlashgan Eagle S. 26 dekabr kuni esa Fingrid operatori Estlink 2 elektr kabeli bir necha oy davomida ishlamasligini xabar qildi.