Indoneziya Apple kompaniyasiga iPhone 16 sotuvini qayta tiklashga ruxsat bermadi

Apple kompaniyasining Indoneziyada iPhone 16 smartfonlari sotuvini qayta tiklashga urinishlari muvaffaqiyatsizlikka uchradi.

Reuters xabariga ko‘ra, Indoneziya sanoat vazirligi Apple kompaniyasining Batam orolida AirTag trekerlarini ishlab chiqaruvchi zavod qurish haqidagi taklifini qabul qilgan bo‘lsa-da, iPhone 16 smartfonlari sotuvini qayta tiklashga ruxsat bermadi. Vazirlikning fikricha, aksessuarlar ishlab chiqarish smartfonlar ishlab chiqarishni mahalliylashtirish muammosini hal qilmaydi, bu esa mahalliy qonunchilikning asosiy talabidir.

Mojaro 2024 yilning kuzida, Apple investitsiya majburiyatlarini bajara olmaganida, talab qilingan 1,7 trillion o‘rniga atigi 1,5 trillion Indoneziya rupiyasi (taxminan 95 million dollar) miqdorida sarmoya kiritgandan so‘ng boshlangan edi.

Qolaversa, kompaniya ishlab chiqarishni zarur 35 foiz mahalliylashtirish darajasiga erisha olmadi. Apple kompaniyasining ketma-ket 10 million, 100 million va hatto 1 milliard dollarlik tovon puli takliflari rasmiylar tomonidan rad etildi.

Eslatib o‘tamiz, shunga o‘xshash cheklovlar Google Pixel smartfonlariga ham ta’sir ko‘rsatgan bo‘lib, ular ham 2024 yil kuzida Indoneziyada mahalliylashtirish talablariga mos kelmasligi sababli taqiqlangan edi.

Indoneziya qonunchiligiga ko‘ra, mamlakatda sotiladigan qurilmalarning kamida 35 foiz mahalliy komponentlardan tayyorlanishi kerak.