Zelenskiy Makron bilan Ukrainadagi «qo‘shinlar kontingenti»ni muhokama qildi

13 yanvar, dushanba kuni Ukraina prezidenti Volodimir Zelenskiy Fransiya prezidenti Emmanuel Makron bilan telefon orqali muloqot qildi. Bu suhbat, jumladan, Ukrainada «harbiy kontingent»ni joylashtirish g‘oyasiga ham tegishli, deb xabar beradi Ukraina davlati rahbari matbuot xizmati.

Ukraina rahbarining so‘zlariga ko‘ra, u Makron bilan «tinchlikka erishish va samarali xavfsizlik kafolatlarini ishlab chiqishda (Ukraina uchun) asosiy ittifoqchilar bilan yaqindan hamkorlik qilishga» kelishib olgan. Ana shunday kafolatlardan biri «Fransiyaning Ukrainaga harbiy kontingentlarni joylashtirish tashabbusi», deb ta’kidladi Zelenskiy Telegramʼda.

Biroq u gap jangovar bo‘linmalar yoki tinchlikparvar kuchlar haqida ketayotganiga aniqlik kiritmadi, deya qayd etadi Fransiyaning AFP axborot agentligi. «Makron Ukrainaga G‘arb qo‘shinlarini yuborish g‘oyasini ilgari surgan, jumladan o‘tgan oyda u Polsha bosh vaziri Donald Tusk bilan o‘t ochish to‘xtatilgan taqdirda u yerga tinchlikparvar kuchlarni joylashtirish imkoniyatini muhokama qilganida», deb eslaydi jurnalistlar.

Ukrainaning hozirgi ehtiyojlari

Ukraina prezidentining veb-saytida aytilishicha, Zelenskiy Makronga Kiyevning hozirgi mudofaa ehtiyojlari, jumladan, havo hujumiga qarshi mudofaa tizimlari va yuqori aniqlikdagi uzoq masofali qurollar haqida «ma’lumot bergan». U, shuningdek, Fransiyaga Ukraina qurol-yarog‘ ishlab chiqarishi va artilleriya snaryadlarini sotib olishni moliyalashtirishga qo‘shilish taklifini bildirdi, deb yozadi Ukraina prezidenti matbuot xizmati.

Ta’kidlanishicha, davlat rahbarlari yaqin kelajakda uchrashishga kelishib olgan va «hamkorlar bilan adolatli tinchlikka erishish va samarali xavfsizlik kafolatlarini ishlab chiqish bo‘yicha qo‘shma qadamlarni muvofiqlashtirish maqsadida» turli darajadagi bir qator aloqalarni rejalashtirish yuzasidan jamoalarga topshiriq bergan.