Alibaba DeepSeek’dan ustun sun’iy intellekt ishlab chiqqanini ma’lum qildi

Qwen 2.5-Max dasturi Mixture-of-Expers arxitekturasiga asoslangan bo‘lib, 20 trilliondan ortiq tokenlar asosida dastlabki tayyorgarlikdan o‘tgan. Dastur odamlarning fikrlari asosida yanada takomillashtiriladi. Foydalanuvchilar ushbu model bilan Qwen Chat deb nomlangan chat-bot orqali muloqot qilishi mumkin.

Alibaba vakillarining aytishicha, Qwen 2.5-Max deyarli barcha samaradorlik ko‘rsatkichlari bo‘yicha AQShning OpenAI va Meta kompaniyalarining GPT-4o hamda Llama-3.1-405B modellaridan ustun turadi. Bundan tashqari, u dekabr oyida taqdim etilgan Xitoyning DeepSeek-V3 versiyasidan ham afzalroq ekani ta’kidlanmoqda.

Alibaba o‘z mahsulotini Xitoy Yangi yilining birinchi kunida, ya’ni Xitoy aholisining aksariyati dam olayotgan paytda e’lon qildi. Bu esa yaqinda ishga tushirilgan DeepSeek startapining keskin muvaffaqiyati nafaqat chet ellik, balki mahalliy raqobatchilarga ham kuchli ta’sir ko‘rsatganidan dalolat beradi, deb ta’kidlamoqda OAV.

DeepSeek 2023 yildan beri sun’iy intellekt modellarini ishlab chiqaradi, biroq u ChatGPT bilan raqobatlasha oladigan bepul chat-botni ishga tushirgandan keyingina investorlarning e’tiborini jalb qildi. Ishlab chiquvchilarning ta’kidlashicha, ilova 27 yanvar kuni dunyo miqyosida eng ko‘p yuklab olingan ilovalar ro‘yxatida birinchi o‘rinni egalladi. Kompaniya ko‘plab nosozliklar bilan kurashib, ilovaning ishlashini ta’minlab turdi.

Xitoyning bepul ilovasi paydo bo‘lishi bilan texnologiya kompaniyalari aksiyalarining qiymati pasaydi. Xususan, Nvidia (protsessorlar ishlab chiqaradi) asoschisi Jyensen Xuang eng ko‘p mablag‘ yo‘qotdi — uning kapitali 20,1 milliard dollarga kamaydi.

Oracle (dasturiy ta’minot ishlab chiqaradi) kompaniyasining hammuassisi Larri Ellison bir kecha-kunduz ichida 22,6 milliard dollar miqdorida boyligini yo‘qotdi. Dell (kompyuter texnikasini ishlab chiqaradi) kompaniyasining asoschisi Maykl Dell 13 milliard dollar, Binance kriptobirjasi asoschisi Chanpen Chjao esa 12,1 milliard dollardan ayrildi.