38 yoshli erkak 13 yoshli qizga ko‘z olaytirdi: Asakadagi bahsli nomus ishi tafsilotlari

Asaka tumanida 38 yoshli erkak voyaga yetmagan qizga 100 ming so‘m evaziga jinsiy aloqa qilishni taklif etgan. Bu ishda uning turmush o‘rtog‘i vositachi bo‘lgan. Sud er-xotinni ma’muriy jazoga tortdi. Holatga ommaviy axborot vositalari e’tibor qaratishi ortidan prokuratura sud hujjatlarini o‘rgana boshladi.

Sud qarorida keltirilishicha, holat 2024 yilning 9 noyabr kuni Asaka tumanining Yuksalish mahallasida bo‘lgan. 1987 yilda tug‘ilgan erkak o‘z yashash xonadonida voyaga yetmagan qizdan jinsiy ehtiyojini qondirib qo‘yishini so‘ragan. U qizga buning uchun 100 ming so‘m taklif qilgan.

Erkakning 1992 yilda tug‘ilgan turmush o‘rtog‘i esa voyaga yetmagan 13 yoshli qo‘shni qizdan erining jinsiy extiyojini qondirib qo‘yishini so‘rab, buning uchun unga 50 ming so‘m berishini aytgan. Qiz ularning bu harakatidan qo‘rqib, uydan qochib chiqib ketgan.

Erkak sudda aybiga iqror bo‘lgan hamda turmush o‘rtog‘idan voyaga yetmagan qo‘shni qizni o‘zining jinsiy extiyojini qondirib qo‘yishi uchun yashash xonadoniga olib chiqishini so‘raganini, so‘ngra o‘zi uxlab qolganini bildirgan.

Ayol ham qilmishidan pushaymonligini aytgan.

“2024 yil 9 noyabr kuni turmush o‘rtog‘im mendan jinsiy ehtiyojini qondirib qo‘yishi uchun qo‘shnimni olib chiqishni so‘radi. Ammo men voyaga yetmagan qo‘shni qizni uyga olib kirib, agar turmush o‘rtog‘imning jinsiy extiyojini qondirib qo‘ysa, 50 ming so‘m berishimni aytdim. Qilmishimdan pushaymonman”, degan ayol sudda.

Jabrlanuvchining qonuniy vakili huquqbuzarga nisbatan qonuniy chora ko‘rishni so‘ragan.

Jinoyat ishlari bo‘yicha Asaka tumani sudi qarori bilan er-xotin shahvoniy shilqimlik qilish huquqbuzarligini sodir etgan deb topilgan. Erkakka 5 sutka ma’muriy qamoq, uning turmush o‘rtog‘iga esa bazaviy hisoblash miqdorining 2 baravari, ya’ni 750 ming so‘m jarima jazosi tayinlangan.

Shilqim erkak sud qaroridan norozi bo‘lib, viloyat sudiga apellyatsiya bergan, viloyat sudi dastlabki qarorni o‘z kuchida qoldirgan.

Holat bo‘yicha ichki ishlar organi jinoyat ishi qo‘zg‘atishni rad etib, shilqim er-xotinni ma’muriy jazoga tortgan, sud ham IIB tomonidan holatga to‘g‘ri baho berilgan deb topgan.

Bosh prokuratura matbuot kotibi Hayot Shamsuddinovning Kun.uzʼga ma’lum qilishicha, mazkur masala Bosh prokuratura tomonidan nazoratga olingan. Hozirda Andijon viloyat prokuraturasi sud hujjatlarini o‘rganmoqda.