Avstraliyada 150 dan ortiq kosatka qirg‘oqqa chiqib qoldi

Avstraliyaning Tasmaniya shtati shimoli-g‘arbida 157 ta kichik kosatka qirg‘oqqa chiqib qoldi. Mahalliy ABC telekanaliga ko‘ra, bu kabi holat so‘nggi 50 yil ichida (1974 yildan buyon) birinchi marta qayd etilmoqda.

Kosatkalar 18 fevralda topilgan. Ular nima uchun sayozlikka tushib qolgani noma’lum.

19 fevral kuniga kelib jonivorlarning 90 tasi hamon tirik edi. Ikkita kosatkani suvga qaytarishga urinishlar ob-havo sharoiti tufayli muvaffaqiyatsiz tugadi. Shu sababli, Tasmaniya bog‘lari va yovvoyi tabiati xizmati vakillarining aytishicha, omon qolgan barcha kosatkalarni azob-uqubatdan qutqarish uchun o‘ldirishga qaror qilingan.

«Bu jonivorlar qirg‘oqda qancha ko‘p qolsa, shuncha ko‘p azob chekadi. [Qutqarishning] barcha muqobil variantlari muvaffaqiyatsiz bo‘lib chiqdi», – deb tushuntirdi dengiz biologi Kris Karlion. Uning so‘zlariga ko‘ra, bunday yirik jonivorlarni o‘ldirish «o‘qotar quroldan foydalangan holda» amalga oshiriladi.

«Bu murakkab vaziyat, ammo bu jonivor uchun uning qiynoqlardan qutulishi nuqtayi nazaridan eng yaxshi natija ekanligini tushunganimizda, biz buni albatta amalga oshiramiz va buni iloji boricha tezroq va insoniylik bilan bajarishga harakat qilamiz», – deya qo‘shimcha qildi Karlion.

Tasmaniya Bog‘lar va yovvoyi tabiat xizmati vakili Brendon Klarkning ma’lum qilishicha, Tasmaniyada bu kabi holatlar uchrab turadi. 2020 yilda Makkuori ko‘rfazi sohillariga 470 ga yaqin qora delfin chiqib qolgan, 2020 yilda esa 200 ta shu kabi jonzot qirg‘oqda paydo bo‘lgan.

Eslatib o‘tamiz, 2022 yilda Dog‘istonning Kaspiy dengizi qirg‘oqlari yaqinidagi turli hududlaridan 2500 ta o‘lik tyulenning jasadi topilgandi. Mahalliy Tabiiy resurslar vazirligi ularning o‘limi sababini «tabiiy omillar» deb atagan.