Saudiya Arabistoni vaziri Shavkat Mirziyoyevga muqaddas Ka’ba yopinchig‘i kisvaning bir parchasini topshirdi

Shavkat Mirziyoyev 19 fevral kuni O‘zbekistonda tashrif bilan bo‘lib turgan Saudiya Arabistoni podshohligi haj va umra ishlari vaziri Tavfiq bin Favzon ar-Rabia boshchiligidagi delegatsiyani qabul qildi. Bu haqda Prezident matbuot xizmati xabar berdi.

Uchrashuv avvalida yuqori martabali mehmon davlat rahbariga Saudiya Arabistoni podshohi Salmon Ol Saud va Valiahd, mamlakat bosh vaziri Muhammad Ol Saudning salomi va samimiy tilaklarini yetkazdi. Vazir, shuningdek, podshohning ko‘p millatli O‘zbekiston xalqiga hadyasi – muqaddas Ka’ba yopinchig‘i kisvaning bir parchasini topshirdi.

O‘zbekiston yetakchisi o‘z navbatida Saudiya Arabistoni rahbariyatiga bebaho tuhfa hamda ziyoratchilarning musulmon dunyosi markazlari — Makka va Madinada bo‘lishi uchun yaratilgan imkoniyatlar va qulay sharoitlar uchun chuqur minnatdorlik bildirdi. Qayd etilishicha, birgina o‘tgan yilning o‘zida 800 mingdan ziyod O‘zbekiston fuqarosi Umra ziyoratini, 15 ming nafari Haj ibodatini ado etgan.

Suhbat chog‘ida o‘zbekistonlik ziyoratchilarga shart-sharoitlar va ko‘rsatilayotgan xizmatlar sifatini yanada yaxshilash, ularning Saudiya Arabistoniga tashrifi xavfsiz va qulay bo‘lishini ta’minlash masalalariga alohida e’tibor qaratilgan.