To‘xtash talabini bajarmaganlar bir yilga haydovchilik huquqidan mahrum qilinishi mumkin

Shavkat Mirziyoyev yo‘l harakati xavfsizligi tizimini takomillashtirish bo‘yicha qonunga o‘zgartishlar kiritish to‘g‘risidagi qonunni ma’qulladi. 

Ma’muriy javobgarlik to‘g‘risidagi kodeksning 194-moddasi (Ichki ishlar organlari xodimining qonuniy talablarini bajarmaslik) uchinchi qism bilan to‘ldirilmoqda.

Transport vositasi haydovchisi tomonidan ichki ishlar organi xodimi yoki xodimlarining transport vositasini to‘xtatish to‘g‘risidagi qonuniy talablarini uzrli sabablarsiz ketma-ket bir necha marta bajarmaslik transport vositasini boshqarish huquqidan bir yil muddatga mahrum qilish bilan birga bazaviy hisoblash miqdorining 30 baravari (11,25 million so‘m) miqdorida jarima solishga sabab bo‘ladi.

Jinoyat kodeksi 261-1-modda (Transport vositasini mastlik holatida boshqarish yoki tekshiruvdan o‘tishdan bosh tortish) bilan to‘ldirilmoqda.