WizzAir O‘zbekistonga amalga oshiradigan reyslarida o‘zbek tilida ham xizmat ko‘rsatadi

WizzAir aviakompaniyasi O‘zbekistonga xizmat ko‘rsatuvchi har bir havo kemasida bort kuzatuvchi va xizmat ko‘rsatuvchi personallar o‘zbek tilida faoliyat yuritishini yo‘lga qo‘yadi. Bu haqda Rasul Kusherbayevning arzini o‘rganib chiqqan Raqobat qo‘mitasi ma’lum qildi.

WizzAir aviakompaniyasi O‘zbekistonga amalga oshirgan reyslarida o‘zbek tilida ham xizmat ko‘rsatishni ta’minlaydi. Bu haqda Raqobatni rivojlantirish va iste’molchilar huquqlarini himoya qilish qo‘mitasi ma’lum qildi.

Qo‘mita xabariga ko‘ra, sobiq deputat Rasul Kusherbayevning «Samarqand-Abu-Dabi» yo‘nalishi bilan «WizzAir» aviakompaniyasi tomonidan ko‘rsatilgan xizmatlarda muammoga duch kelgani yuzasidan murojaati ko‘rib chiqilgan.

«Raqobat qo‘mitasining olib borgan o‘rganishlarida murojaatchining uchish davrida aviakompaniyaning ekipaj a’zolari tomonidan xorijiy tilda xavfsizlik qoidalari haqida ma’lumot berilgani, bu qoidalarni o‘zbek va rus tillarida tushuntirib berishlari so‘ralganida xodim tomonidan unga nisbatan qo‘pol muomalada bo‘lingani, bortni tark etish talab qilingani va shu tarzda fuqaro mazkur reysda Abu-Dabiga yetib borgani ma’lum bo‘ldi.

Qo‘mita tomonidan Transport vazirligiga o‘rganishlar yuzasidan so‘rov xati yuborildi. Natijada o‘zboshimchalik bilan xatti-harakatlarni amalga oshirgan mazkur aviakompaniya xodimlariga nisbatan chora ko‘rildi», deyiladi xabarda.

Qayd etilishicha, WizzAir aviakompaniyasi 2025 yilda O‘zbekistonga xizmat ko‘rsatuvchi har bir havo kemasida bort kuzatuvchi va xizmat ko‘rsatuvchi personallar o‘zbek tilida faoliyat yuritishini yo‘lga qo‘yadi.