Rossiya Davlat Dumasi raisi Toshkentga rasmiy tashrif bilan keldi

Rossiya Davlat Dumasi raisi Vyacheslav Volodin rasmiy tashrif bilan O‘zbekistonga keldi. U mamlakat rahbariyati bilan uchrashadi va Oliy Majlisning ikkala palatasiga tashrif buyuradi. Bu haqda Rossiya Davlat Dumasi xabar berdi.

Qayd etilishicha, 2022 yilda Volodin O‘zbekiston poytaxtiga tashrif buyurganida Davlat Dumasi va Oliy Majlis Qonunchilik palatasi o‘rtasida hamkorlik bo‘yicha parlamentlararo komissiya tuzish to‘g‘risida kelishuv imzolangan edi. Dumaning aniqlik kiritishicha, birinchi yig‘ilish 2024 yil 19 fevralda bo‘lib o‘tgan va unga Volodin va Qonunchilik palatasi spikeri Nurdinjon Ismoilov raislik qilgan.

2025 yil fevral oyida Rossiya prezidenti Vladimir Putin va O‘zbekiston prezidenti Shavkat Mirziyoyev telefon orqali muloqot chog‘ida ikki davlat o‘rtasidagi sarmoyaviy hamkorlik va sanoat kooperatsiyasining o‘sishini muhokama qilgan edi. Ikki mamlakat o‘rtasidagi savdo-iqtisodiy va sarmoyaviy hamkorlikning asosiy ko‘rsatkichlari o‘sish dinamikasini ta’minlashga alohida e’tibor qaratildi.

Fevral oyida Rossiyaning O‘zbekistondagi savdo vakili Konstantin Zligostev so‘nggi 6 yil ichida Rossiya va O‘zbekiston o‘rtasidagi tovar ayirboshlash hajmi qariyb ikki baravar ko‘payganini va 2024 yil oxiriga kelib 10 milliard dollardan oshganini ma’lum qildi. Shuningdek, u ikki davlat o‘rtasidagi hamkorlikni rivojlantirish uchun istiqbolli tarmoqlar: energetika, kimyo va tog‘-kon sanoati, qishloq xo‘jaligi, oziq-ovqat sanoati va yuqori texnologiyalar ekanini ta’kidladi.