AQShda aeroportda o‘z itini o‘ldirgan ayol qo‘lga olindi

Politsiya ma’lumotiga ko‘ra, u 9 yoshli tsvergshnautser zotiga mansub Tayvinn laqabli itni reysga olishga ruxsat berilmaganidan so‘ng o‘ldirgan, deb yozmoqda Orlando Sentinel.

Kuzatuv kameralari yozuvlarida Lourens Kolumbiya poytaxti Bogota shahriga parvoz oldidan aviakompaniya agentlari bilan taxminan 15 daqiqa davomida tortishgani qayd etilgan. Keyin u it bilan yaqin atrofdagi hojatxonaga yo‘l olgan, ammo u yerdan faqat yakka o‘zi chiqib kelgan. Bundan so‘ng terminalni tark etgan, keyin esa qaytib kelib, uchoqqa chiqib ketgan.

Mehmonxonalardan biri xodimasining aytishicha, u hojatxonada bir ayol (keyinchalik u Lourens deb aniqlangan) poldagi suv va it yemini tozalayotganini ko‘rgan. 20 daqiqa o‘tib, u yana hojatxonaga kirgan va o‘sha ayol hojatxona kabinkasidan chiqib kelganini ko‘rgan. Xodima chiqindi qutisini olib chiqmoqchi bo‘lganida, uning og‘ir ekanini sezgan va qutini ochib qaraganda, ichida itning jasadini topgan.

Politsiya voqea joyiga yetib kelganida, paket ichida Elison Lourens ismi va telefon raqami yozilgan jyeton, itning bo‘yinbog‘i, sayohat sumkasi va «xizmat iti» degan yozuvli kamarcha borligi aniqlangan.

Veterinariya mutaxassislari it tanasini tekshirganda, chap oyog‘ida qon izlari bo‘lgan. Sud-tibbiyot ekspertizasiga ko‘ra, itning o‘limiga suvda cho‘ktirilish sabab bo‘lgan.

It tanasidan mikrochip ham topilgan, undagi raqam Lourensga tegishli ekani tasdiqlangan.

Politsiya ayolning AQShga qachon qaytgani haqida ma’lumot bermagan. U shu hafta ichida sherif ofisi tomonidan hibsga olingan, ammo 5 ming dollar garov evaziga ozod etilgan.

Endi Elison Lourensga hayvonga nisbatan shafqatsiz muomala qilish moddasi bo‘yicha og‘irlashtiruvchi holatlar bilan ayblov qo‘yilgan. Agar u aybini tan olsa 5 yilgacha ozodlikdan mahrum etilishi mumkin.