Toshkent metrosining Yunusobod yo‘nalishida FacePay orqali to‘lov tizimi ishga tushirildi

Transport vazilrigi yaqin orada ushbu tizim barcha metro bekatlarida joriy etilishini ma’lum qildi.

Foto: Transport vazirligi

FacePay to‘lov tizimi endi Toshkent metropolitenining Yunusobod liniyasida ham ishga tushirildi, deb xabar beradi Transport vazirligi.

Yangi xizmat yo‘lovchilarga turniket kamerasiga qarab naqd pul, karta va hatto smartfonsiz yo‘l haqini to‘lash imkonini beradi.

Qayd etilishicha, ushbu tizim Click va ATTO bilan hamkorlikda ishlab chiqilgan.

«FacePay metroda sayohat qilishni yanada qulaylashtiradi, to‘lov vaqtini qisqartiradi va qog‘oz chiptalarga bo‘lgan ehtiyojni bartaraf etadi. Yaqin orada ushbu tizim barcha metro bekatlarida joriy etiladi», — deyiladi xabarda.

FacePay ishlashi uchun avvalo yo‘lovchilarning yuzi haqidagi ma’lumotlar qurilmaning bazasiga kiritilishi lozim. Buning uchun yo‘lovchi ATTO yoki Click ilovasiga kirib, tegishli funksiyani faollashtirish orqali yuzni skanerlashi kerak bo‘ladi.

Eslatib o‘tamiz, 2021 yilda Toshkent metrosining «Buyuk ipak yo‘li» bekatida FacePay tizimi joriy etilgandi. Ammo keyinroq qurilmalar olib tashlangan. 2023 yilda esa aynan shu bekatda FacePay tizimini yana sinovdan o‘tkazish boshlangan edi.

#FacePay #Toshkent metrosi