Fransiya antimonopoliya regulyatori Appleʼni 150 mln yevro jarimaga tortdi

Fransiyaning Autorite de la concurrence antimonopoliya regulyatori Amerikaning Apple kompaniyasini 150 million yevro jarimaga tortdi. Regulyator bayonotida ta’kidlanishicha, kompaniya iOS va iPadOS operatsion tizimlariga ega qurilmalariga mobil ilovalarni tarqatishda ustun mavqeyini suiiste’mol qilgan.

Qonunbuzilishi 2021 yil apreldan 2023 yil iyulgacha bo‘lgan davrni qamrab oladi.

Nazorat organining aniqlashicha, ilovalarning foydalanuvchi faoliyatini kuzatish imkoniyatlarini tartibga soluvchi tizim — App Tracking Transparency (ATT) mexanizmi Apple tomonidan e’lon qilingan shaxsiy ma’lumotlarni himoya qilish maqsadiga erishish uchun zarur emas.

2021 yilda ishga tushirilgan ATT ilovani ishlab chiqqan dasturchilarga foydalanuvchilardan o‘zlarining faolligini kuzatishga ruxsat berishlarini so‘rash majburiyatini yuklaydi.

«Ushbu mexanizmni joriy etish bir nechta ruxsat so‘rovchi oynalarning paydo bo‘lishiga olib kelgan, bu esa uchinchi tomon ilovalari va iOSʼdan foydalanishni juda murakkablashtirgan», — deyiladi regulyator xabarida.

Bundan tashqari, mazkur oynalar bilan bog‘liq qoidalar «mexanizmning neytralligiga putur yetkazgan, natijada, ilova ishlab chiquvchilar va reklama xizmatlari yetkazib beruvchilarga iqtisodiy zarar yetkazilgan».

Apple Fransiya hukumatining qaroridan hafsalasi pir bo‘lganini bildirdi, biroq regulyator ATT mexanizmini o‘zgartirish bo‘yicha aniq talablar qo‘ymaganini ta’kidladi. Qayd etilishicha, ushbu tizim foydalanuvchilarga shaxsiy ma’lumotlari ustidan qo‘shimcha nazorat imkoniyatini beradi va iste’molchilar, faollar hamda ma’lumotlar himoyasi bo‘yicha rasmiy organlar tomonidan keng qo‘llab-quvvatlangan.