Berbok: Germaniya hukumati «Shimoliy oqim-2» qayta ishga tushirilishiga qarshi

Germaniya rahbariyati «Shimoliy oqim-2» gaz quvurini ishga tushirish imkoniyatini muhokama qilmayapti, avvalroq Xristian-demokratik ittifoqdan bo‘lgan ayrim siyosatchilar va OAV bu borada bayonot bergandi. Bu haqda Germaniya tashqi ishlar vaziri vazifasini bajaruvchi Annalena Berbok 1 aprel, seshanba kuni Kiyevda Ukraina prezidenti Volodimir Zelenskiy bilan bo‘lib o‘tgan matbuot anjumanida ma’lum qildi.

«Shimoliy oqim-2» bo‘yicha noto‘g‘ri qaror bizga, nemis jamiyatiga juda qimmatga tushdi. 24 fevralgacha (2022 yil) biz doimiy ravishda jiddiy ogohlantirishlar oldik, ayniqsa Sharqiy Yevropadagi hamkorlarimiz va do‘stlarimizdan – Ukrainadan, Boltiqbo‘yi davlatlaridan, Polshadan – bu gaz quvuri iqtisodiy loyiha emas, balki keyingi agressiyaga xizmat qilishi bo‘yicha», - dedi Berbok.

«Biz jamiyat sifatida buning uchun katta narx to‘ladik. Chunki biz Rossiya gazi va neftidan mustaqil bo‘lishimiz kerak edi. Axir, Rossiya prezidentining o‘zi — buni unutmaslik kerak — bu gaz quvurini Yevropa va Germaniyaga qarshi qo‘yib qo‘ydi. Uning o‘zi ham bu gaz quvuridan boshqa foydalanishni istamasligini tan oldi. Va buning uchun biz milliardlab yevro to‘ladik. Endi bu quvurni qayta ishga tushirib bo‘lmasligi aniq», - deya qo‘shicha qildi Germaniya Tashqi ishlar vazirligi rahbari.

«Bu Germaniyaning qo‘lidagi qaror. Bu qaror avvalgi hukumat («svetofor» koalitsiyasi) tomonidan hozirgi hukmron partiya (XDI/XSI bloki) bilan mutlaq kelishilgan holda qabul qilingan. Aynan Ukrainaga nisbatan siyosatda turli demokratik partiyalar o‘rtasida to‘liq konsensusni ko‘rish mumkin», deb ishontirdi siyosatchi.

«Men yana bir bor ta’kidlamoqchimanki, Yevropa xavfsizligi va iqtisodiy xavfsizligi bir-biri bilan chambarchas bog‘liq. Rossiyaning agressiv urushi buni juda yaqqol ko‘rsatdi. Bu barcha Yevropa davlatlarini iqtisodiy va moliyaviy jihatdan aql bovar qilmaydigan darajada qiyin holatga solib qo‘ydi. Biz buni boshqa geosiyosiy masalalarda ham ko‘rib turibmiz. Shuning uchun bu sof iqtisodiy loyiha, degan mantiq endi mavjud bo‘lishi mumkin emas. Chunki bu bizning xavfsizligimizga tahdid soladi», deya xulosa qildi Berbok.