Chirchiqda janjal oqibatida bir kishi vafot etdi

Toshkent viloyati Chirchiq shahrida ikki kishi janjali oqibatida ulardan biri shifoxonada vafot etdi. Toshkent viloyati IIBB bu holat yuzasidan ma’lumot berdi.

Unga ko‘ra, 5 mart kuni Chirchiq shahrida 37 yoshli Hamid Dustov va uning tanishi, 31 yoshli Murat Kudabayev o‘rtasida janjal chiqqan. Xabarda janjal spirtli ichimlik oldi-sotdisi ustida yuzaga kelgani, Hamid Muratga og‘ir tan jarohatlari yetkazgani, jabrlanuvchi tan jarohatlari oqibatida keyinchalik shifoxonada vafot etgani aytiladi.

«Gazeta.uz» aniqlagan tafsilotga ko‘ra, Dustov o‘sha kuni taxminan soat 19:00 da o‘ziga tegishli spirtli ichimliklar do‘konini yopib, uyiga qaytayotganida o‘z tanishi Muratni uchratgan. Murat undan do‘konni ochish va unga alkogol sotishni so‘ragan, ammo rad javobini olgan. Shundan so‘ng ularning bahslashuvi mushtlashuvga aylanib ketgan.

Janjal davomida Dustov raqibining boshi va yuziga bir necha marta qo‘l va oyoqlari bilan zarba bergan. Jabrlanuvchi Chirchiq shahar tibbiyot birlashmasiga olib borilib, unga ochiq bosh miya jarohati, bosh miya lat yeyishi, chap chakka-tepa suyagi sinishi, o‘ng qosh va chap chakka-tepa sohasi yirtilgan jarohatlari, travmatik shok tashxisi qo‘yilgan.

Ko‘rsatilgan tibbiy yordamga qaramay, Marat Kudabayev 6 mart kuni jonlantirish bo‘limida vafot etgan. Uning bir farzandi yetim qolgan.

Ijtimoiy tarmoqlarda Maratning onasi Yelenaning murojaati tarqaldi. Ayol o‘g‘li Marat Hamidning hujumiga uchragan ayolni himoya qilishga uringanida kaltaklangani haqida aytadi.

Uning so‘zlariga ko‘ra, Maratning bosh miyasi jarohatlanishi va bosh suyagi sinishidan tashqari, burun suyaklari sinib, suyak bo‘laklari siljigan, shuningdek, uning ikkita qovurg‘asi singan, keyinchalik o‘pkasi teshilgan.

«Hamid o‘sha kuni ayolni kaltaklagan (u tirik, ammo davolanish ko‘rinishidagi asoratlar qolgan). Murat bu ayolni himoya qilgan», – deb yozadi ona va mushtumzo‘r javobgarlikdan qochib qutulmasligi uchun ushbu voqeani keng jamoatchilikka tarqatishni so‘ragan. «Chunki huquq-tartibot idoralari uning harakatlarini oddiy ko‘cha mushtlashuvi deb baholamoqda», deya qo‘shimcha qilgan u.

Holat yuzasidan Jinoyat kodeksining 104-moddasi 3-qismi «d» bandi (jabrlanuvchining o‘lishiga sabab bo‘lgan qasddan badanga og‘ir shikast yetkazish) bilan jinoyat ishi qo‘zg‘atilgan.

7 mart kuni fuqaro D.X.ga nisbatan ayb e’lon qilinib, «qamoqqa olish» tarzidagi ehtiyot chorasi qo‘llangan.

Huquq-tartibot idoralari ma’lumotlariga ko‘ra, Hamid Dustov muqaddam sudlangan, 2011 yilda u talonchilikda aybdor deb topilgan. Marat Kudaboyev ham 2023 yilda o‘g‘rilik uchun sudlangan, biroq ish tomonlarning yarashuvi munosabati bilan tugatilgan.

Toshkent viloyati IIBB matbuot xizmati mazkur holat bo‘yicha tergov ketayotgani bois ijtimoiy tarmoq faollaridan asoslanmagan xabarlarni tarqatmaslikni so‘radi.

«Hozirda OAV va jamoatchilik tomonidan holat yuzasidan turli, haqqoniyligi tekshirilmagan talqinlar e’lon qilinmoqda», – deyiladi xabarda.

Idora Jinoyat kodeksining 239-moddasiga ko‘ra, surishtiruv yoki dastlabki tergov ma’lumotlarini surishtiruvchi, tergovchi yoki prokurorning ruxsatisiz oshkor qilish jinoiy javobgarlikka sabab bo‘lishidan ogohlantirgan.

«Hozirda mazkur jinoyat ishi yuzasidan tergov jarayoni ketayotganini inobatga olib, ijtimoiy tarmoq faollaridan voqea tafsilotlarini bir tomonlama tavsif qilmaslikni va asoslantirilmagan axborot tarqatmasliklarini so‘raymiz», – deya qayd etiladi xabarda.