NASA Oy bilan to‘qnashishi mumkin bo‘lgan 60 metrlik asteroidni namoyish etdi

NASA’ning «Jyeyms Uebb» teleskopi 2032 yilda Oy bilan to‘qnashishi mumkin bo‘lgan 2024 YR4 asteroidini suratga oldi. Bu haqda Webb Space Telescope rasmiy sayti orqali ma’lum qilindi.

«Tadqiqotning asosiy maqsadi 2024 YR4’ning o‘lchamini aniqlash edi — biz uni 60 metr atrofida deb baholayapmiz. Bu taxminan 15 qavatli bino degani», — deydi Jon Hopkins universiteti astronomi Endi Rivkin.

Rivkinning so‘zlariga ko‘ra, 2024 YR4’ni kuzatish kelajakda Yerga xavf tug‘dirishi mumkin bo‘lgan boshqa asteroidlarni tadqiq etishda «bebaho amaliyot» sifatida xizmat qilgan.

NASA aprel oyida 2024 YR4’ning Oy bilan to‘qnashish xavfini 1,7 foizdan 3,8 foizga qadar oshirgan edi.

Yanvarda astronomlar 2024 YR4’ni 2004 yildan beri Yerga tahdid uyg‘otayotgan eng xavfli asteroid deb atagandi. O‘shanda uning Yer bilan to‘qnashish ehtimolligi 6 foizga baholangan. Keyinroq ushbu ko‘rsatkichlar pasaytirildi. Fevralda ESA to‘qnashuv xavfini 2,2 foizga baholadi.

Avvalroq ulkan va ehtimoliy xavfli 2014 TN17 asteroidi Yerga taxminan 77 300 km/soat tezlikda yaqinlashishi to‘g‘risida xabar berilgandi. Kosmik sayohatchi 5,1 million kilometr uzoqlikda uchib o‘tadi — bu Oygacha bo‘lgan masofadan taxminan 13 baravar uzoqdir.