Porsche konserni tank ishlab chiqarishni boshlashi mumkin

Germaniyaning Porsche avtomobilsozlik kompaniyasi ko‘p milliardlik yo‘qotishlari sabab yangi biznes yo‘nalishlarni ko‘rib chiqmoqda, ulardan biri mudofaa sanoati bo‘lishi mumkin. Bu haqda Europäische Sicherheit & Technik mudofaa texnologiyalariga oid jurnaldagi maqolada so‘z boradi.

Konsern 2024 yilda 20 milliard yevro zarar ko‘rgan, shu bois Porsche rahbariyati qat’iy tejamkorlik choralari va yangi biznes yo‘nalishlarini izlamoqda. Ular orasida kompaniyaning qurol bozoriga kirishi ham muhokama qilinyapti.

Nashrning qayd etishicha, Porsche — Germaniya Mudofaa vazirligi bilan ishlashda tajribaga ega. 1958 yildan 1965 yilga qadar kompaniya bosh pudratchi sifatida bundesver uchun «tip 814» nomi ostida tank ishlab chiqargan. Keyinchalik ushbu ishlanmalar Leopard tanklarining birinchi avlodi asosini tashkil etgan.

Bundan tashqari, 2024 yilda Porsche dronlarni ishlab chiqarish bilan shug‘ullanuvchi Quantum Systems startapiga investitsiya kiritgan edi.

Ma’lumotlarga ko‘ra, Porsche mudofaa loyihalariga 2 milliard yevrogacha sarmoya yo‘naltirishi mumkin.

O‘z navbatidagi Porsche SE holding vakili Kristof Tsemelka kompaniya mudofaa sanoatiga e’tibor qaratishi mumkinligini rad etdi.