“Derazani ochishim bilan tahoratxona portlab ketdi”: Izboskandagi masjiddan reportaj
31 mart kuni Andijon viloyati Izboskan tumanidagi “Ahmadali hoji” jome masjidi tahoratxonasida gaz portlashi oqibatida 4 kishi vafot etdi. Yana 10 kishi esa turli jarohatlar bilan shifoxonada davolanmoqda. Kun.uz muxbiri voqea joyida bo‘lib tafsilotlarni o‘rgandi.
Masjidga borganimizda aynan portlagan tahoratxona tag-tugi bilan tozalangan, tutash tahoratxona binosida esa hashar yo‘li bilan tozalash ishlari olib borilayotgan ekan. Birozdan keyin maxsus texnikalar yordamida keyingi tahoratxona binosi ham buzib tashlandi.
“Masjid tahoratxonasi 2022 yil qurilishi boshlanib 2024 yilda foydalanishga topshirilgan edi.
Hayit kunining ertasi soat 12:15 lar chamasi edi. Peshinga harakat qilib turgandim. To‘satdan gumburlagan ovoz eshitildi. Chiqib qarasak chang-to‘zon. Bino yer bilan bitta bo‘lgan ekan. Bino bosib qolgan odamlarni tashqariga chiqarib oldik. Vafot etganlar peshin namozini o‘qish uchun tahoratxonada tayyorgarlik ko‘rishayotgan bo‘lgan.

Bino bir vaqtning o‘zida 60 kishi tahorat olishi mumkin bo‘lgan joy edi. Tahoratxona qurilgan paytidayoq binoga gaz tarmog‘i olib kelingan bo‘lgan. Ayni paytda tahoratxonani tiklash ishlarini olib boryapmiz”, – deydi masjid imom noibi Ihvoldin Zuhriddinov.
O‘lganlardan biri yaqin do‘stim edi
“O‘sha kuni uyda tahorat olib masjidga kelib peshin vaqti kirishini kutib o‘tirgan edim. 70 yoshga kirdim. 50 yildan beri har dushanba kuni namozdan keyin sinfdoshlarim bilan masjid ro‘parasidagi choyxonada osh qilib yeymiz.

Shu kuni ham do‘stlarim bilan yig‘ilishgandik. O‘lganlarning biri yaqin oshnam edi. U bilan so‘rashdim. Do‘stim tahorat olib namoz o‘qiyman dedi-da ichkariga kirib ketdi. Oradan 10 minut o‘tdi chamasi birdan tahoratxona gumburlab ag‘darildi. Ichkaridan 4-5 odamni olib chiqishdi. Shu orada IIB xodimi do‘stimni suratini ko‘tarib shu odamni kim taniydi deb yurgan ekan. Ne ko‘z bilan ko‘rayki, suratdagi do‘stim edi. Bir kam 70 yoshda edi.

Yanayam Xudo saqladi. Bozor masjidga tutash hududda. Bozorchilar odatda to‘lib ketardi peshinga yaqin. Agar yarim soatdan keyin portlaganda o‘lim ko‘p bo‘lardi”, – deydi yaqin do‘stidan ayrilgan Olloyor ota Sobirov.
Zapravka portladi deb o‘yladik
“Masjid hududiga tutash joydagi bozorda quruq mevalar sotaman. Oshxonada ovqatlanayotgan edim. Birdan masjid tomondan portlagan ovoz eshitildi. Tamaddixona oynalari portlash kuchidan zirillab ketdi. Portlagan tomonda zapravka bor edi.

Avvaliga shu zapravka portladi deb o‘yladik. Kirsak tahoratxona portlagan ekan. Odamlarni tashqariga chiqarishga yordam qildik. Yaxshiyamki tahoratxonada odam kam edi. Talafot kamroq bo‘ldi”, – deydi voqea guvohlaridan biri Omonullo Madaminov.
“31 mart kuni soat taxminan 12:19 larda Izboskan tumani Mirzo Ulug‘bek mahallasida joylashgan masjidda havo gaz aralashmasining chaqnashi sodir bo‘lganligi yuzasidan Andijon viloyati FVBga xabar kelib tushdi.

Tegishli idora vakillari voqea joyiga kelib zaruriy choralar ko‘rildi. Baxtsiz hodisada 4 fuqaro vafot etib, 10 nafari turli darajadagi tan jarohatlari oldi. Ayni paytda tergov harakatlari olib borilmoqda”, – dedi Andijon viloyati FVB Axborot xizmati boshlig‘i Hayotbek Rahimov.
Otam tahoratxonaga doim birinchi kirardi
“Masjiddagi portlashda vafot etganlardan biri otam bo‘ladi. O‘sha kuni otam Halimjon Abdullayevning do‘stlari bilan oshi bor edi.

Namozdan chiqib odatda haftaning dushanba kuni osh qilib yig‘ilishardi. Portlashda otamdan ayrildik. Tahoratxonaga kirgan ekan. Portlash bo‘lgani haqida xabar berishdi. Masjidga borib otamni topa olmadim. Ekspertizaga olib ketishgan ekan. Otam odatda oyog‘i og‘rigani uchun jamoatdan oldinroq harakat qilib vaqtliroq tahoratxonaga kirardi”, – deydi portlashda otasidan ayrilgan o‘g‘il.
Derazani ochishim bilan bino portladi...
“Ishimdan bemalolroq bo‘lganimda masjidga borib turardim. 12:10 larda masjidga peshin o‘qish uchun bordim. Tahoratxonaga kirayotganimda masjid xodimlaridan biri kotyoldan xabar oling suv sovib ketdi deb aytdi. Podvalga tushib eshikni ochishimni bilaman dimog‘imga gaz hidi urildi. Isitish moslamasi podvalda joylashgan edi-da.

Kotyol eshikdan taxminan 10 metr uzoqlikda joylashgan. Kotyol oldiga borib eng avvalo gazni krandan berkitib kichik oynalarni ochishga tushdim. Chiroqlarni yoqmagan edim. Derazalarni ochishda davom etdim. Birdan kuchli portlash bo‘ldi. Ustimga beton plita tushdi. Plita ostida taxminan 1-1,5 soat qolib ketdim. Dod deb baqirib odamlarni yordamga chaqirdim. Lekin meni hech kim eshitmasdi. Nihoyat kimdir baqirgan ovozimni eshitdi. Betonlar orasidan olib chiqishdi.
Tahoratxona ishga tushganiga 10 oy bo‘lgan bo‘lsa suv isitish tizimida bunday nosozlik biror marta kuzatilmagan edi”, – deydi portlashning bevosita guvohi bo‘lgan Muhammadrizo Abdurahmonov.
U ayni paytda Respublika shoshilinch tibbiy yordam ilmiy markazi Andijon filialining kuyish bo‘limida davolanmoqda.
Tibbiyot markazining neyroxirurgiya bo‘limida Inomjon Shomurodov va Isomiddin Rahimovlar ham davolanmoqda. Ular portlash paytida tahoratxonada bo‘lgan va plita yorilgan paytda yerto‘laga qulashgan. Jarohatlarni hisobga olmaganda ayni paytda ularning holati ancha yaxshilangan.


Respublika shoshilinch tibbiy yordam ilmiy markazi Andijon filiali direktori o‘rinbosari Abdumutalib Akbaraliyevga ko‘ra, baxtsiz hodisadan jabrlangan 7 nafar bemor filialga olib kelingan.

Ulardan 2 nafari neyroxirurgiya, 2 nafari travmatologiyada, 1 nafari neyroreanimatsiyada, 1 nafari kuyish bo‘limida davolanmoqda.
Holat yuzasidan Andijon viloyat prokuraturasi tomonidan Jinoyat kodeksining 205 (hokimiyat yoki mansab vakolatini suiiste’mol qilish), 259-moddalari (yong‘in xavfsizligi qoidalarini buzish) bilan jinoyat ishi qo‘zg‘atilib, dastlabki tergov harakatlari olib borilmoqda.
Sarvar Ziyoyev,
Kun.uz
Operator va montajchi – Sardor Mamirov
Mavzuga oid

18:08 / 04.04.2025
«Profilaktik tadbirlarni to‘g‘ri tushunishingizni so‘raymiz» – Musulmonlar idorasi masjidlardagi texnik nazorat ishlari haqida

23:19 / 31.03.2025
Andijonda masjidda gaz portladi. Asosiy ma’lumotlar

22:12 / 31.03.2025
Andijondagi masjidda ro‘y bergan portlash yuzasidan jinoyat ishi qo‘zg‘atildi

20:57 / 31.03.2025