Yana Namangan: mashinani ijaraga olgan o‘quvchilar ayanchli YTHga uchradi

2 aprel kuni Namangan viloyati, Davlatobod tumanida Porloq mahallasida maktab o‘quvchisi tomonidan boshqarilayotgan Nexia-3 avtomobili qarama-qarshi yo‘nalishga chiqib, yuk avtomobili bilan to‘qnashdi.

Namangan viloyati IIB YHXB videolavhasida avtomobilning yuk mashinasi bilan to‘qnashgani va yuk mashinasi uni bir necha metrga sudragani ko‘rinadi.

To‘qnashuv oqibatida yengil avtomobil haydovchisi va yo‘lovchisi bo‘lgan maktab o‘quvchilari og‘ir ahvolda shifoxonaga yotqizilgan. Ulardan birida bosh miyasi va jag‘ suyagi sinishi, boldir suyaklari sinishi ham kuzatilgan.

Rasmiylarga ko‘ra, maktab o‘quvchilariga mashinani ijaraga bergan fuqaroning o‘zi ham avtomobilni ijaraga olgan bo‘lgan. Uning o‘zi o‘quvchilardan ijara uchun 150 ming so‘m olgan, o‘rtada vositachi bo‘lgan 11-sinf o‘quvchisi esa 70 ming so‘m olgan. Avtomobilni ijaraga bergan yigitning otasi va yuk mashinasi haydovchisi jamoatchilikka murojaat qilib, yosh bolalarning rulga o‘tirishiga ruxsat bermaslikni so‘ragan.

So‘nggi paytlarda mablag‘ evaziga voyaga yetmaganlarga ijaraga mashina berish mudhish YTH va o‘limlar bilan yakun topyapti.

Xususan, 2024 yilning 23 aprel kuni Navoiy viloyatining Navbahor tumanida inson o‘limi bilan bog‘liq YTH sodir bo‘ldi. Keyinchalik YTHga uchragan Matiz mashinasi Karmana va Navoiy shahridagi maktablarning 8- va 9-sinf o‘quvchilari tomonidan ijara olingani oydinlashdi. Natijada, 2 o‘quvchi voqea joyida halok bo‘ldi, uchinchi o‘quvchi esa og‘ir tan jarohati oldi.

O‘tgan yili 2 oktabr kuni esa Namangan shahrida ham shu kabi YTH sodir bo‘ldi. 5 nafar o‘quvchi ijaraga olgan Gentra’ni shaharning Marg‘ilon ko‘chasida katta tezlikda boshqarib, yo‘lning qarama-qarshi tomoniga chiqib ketgan. Yo‘l o‘rtasidagi beton to‘siqdan oshib o‘tgan mashina yuk mashinasiga borib urilgan. YTH oqibatida 3 nafar o‘smir vafot etgan, 2 o‘smir og‘ir tan jarohati olgan.

Amaldagi qonunchilikda, xususan, MJtKning 135-moddasiga ko‘ra, «...transport vositalarini boshqarish huquqiga ega bo‘lmagan shaxsga transport vositalarini boshqarishning topshirilishi» — BHMning 5 baravari miqdorida jarima solishga sabab bo‘ladi.

Joriy yilda MJtKga kiritilgan o‘zgarishlarga ko‘ra esa transport vositalaridan foydalanish uchun mas’ul bo‘lgan shaxs «mastlik... yoki transport vositalarini boshqarish huquqi bo‘lmagan shaxslarning transport vositalarini boshqarishiga yo‘l qo‘yishi»ga BHMning 30 barobari miqdorida jarima solish belgilangan. Lekin yuqoridagi kabi holatlarda o‘quvchilarga mashinani ijaraga berganlar uchun qaysi moddada nazarda tutilgan ayblov qo‘yilishi qonunchilikda aniq belgilanmagan.