«Rossiya otashkesimga tayyorgarlik ko‘rayotganining alomati yo‘q» - NATO razvedkasi
Ukraina frontida Rossiya armiyasi otashkesimga tayyorgarlik ko‘rayotganini tasdiqlovchi hech qanday belgilar kuzatilmayapti. Bu haqda NATOning yuqori lavozimdagi amaldoriga tayanib, Deutsche Welle nashri xabar berdi.

Foto: RBC
Alyans ma’lumotlariga ko‘ra, Rossiya armiyasi deyarli ming kilometrga cho‘zilgan front bo‘ylab Ukraina qurolli kuchlariga bosimni kuchaytirishda davom etmoqda. Bu bilan Rossiya vaqt yutib, kelgusidagi ehtimoliy muzokaralarda ustunlikka erishishni maqsad qilmoqda. «Jang maydonida rossiyaliklar otashkesimga tayyorgarlik ko‘rayotganiga doir hech qanday belgilar yo‘q, — dedi NATO rasmiysi jurnalistlar uchun o‘tkazilgan brifingda. — Rossiyaning bu urushdagi maqsadlari o‘zgarganiga doir ham hech qanday alomat ko‘rinmayapti».
NATOning baholashicha, jang maydonidagi vaziyat Ukraina uchun murakkabligicha qolmoqda. Rossiya esa ustunlik va tashabbusni saqlab qolgan. Ukrainada shaxsiy tarkib va qurol-yarog‘ yetishmovchiligi Rossiyaga foyda keltirmoqda.
Alyans ma’lumotlariga ko‘ra, Rossiya armiyasi kun sayin 1000 nafardan ortiq halok bo‘lgan va yaralanganlardan iborat yo‘qotishlarga uchrayapti. Urush boshlanganidan buyon umumiy yo‘qotishlar soni 900 ming kishiga yaqinlashgan. Biroq hukumat tomonidan taklif etilayotgan juda yuqori bonuslar kontraktchilar safiga katta oqimni ta’minlamoqda va yo‘qotishlar o‘rnini to‘ldirilayapti.
NATO rasmiysining ta’kidlashicha, Rossiya jamiyati ham hali yo‘qotishlar darajasini qabul qilib bo‘lmas darajada, degan nuqtaga yetmagan. Hukumat esa «sekin ildamlash ortidan kelayotgan muvaffaqiyatlar evaziga ham katta yo‘qotishlarga tayyorligini» ko‘rsatmoqda. Moskva harakatlari Rossiya rahbariyati vaqtning o‘zi tomonida, degan ishonchda ekanini namoyon qilmoqda. «Biz Putin muzokaralarga yaxshi niyatda kirishmoqda, deb o‘ylamaymiz», — dedi NATO vakili.
Ukrainaning DeepState OSINT-loyihasi ma’lumotlari ham shundan dalolat beradi: tinchlik muzokaralari boshlanganiga qaramasdan, Rossiya armiyasi frontdagi hujumlar sonini keskin oshirgan. 1–26 mart oralig‘ida RF armiyasi hujumlar sonini fevral oyiga nisbatan 17 foizga oshirgan. Mart oyi oxirida esa kuniga 200 dan ortiq shturm amalga oshirgan — bu 2025 yil boshidan beri rekord hisoblanadi. Biroq, Rossiya egallagan yangi hududlar so‘nggi oylar ichida eng kichigi bo‘lib qolmoqda.
Dronlar orqali amalga oshirilgan hujumlar soni ham mart oyida rekord ko‘rsatkichga yetdi: 18 fevralda Ar-Riyodda Rossiya va AQSh o‘rtasida muzokaralarning ilk bosqichi o‘tkazilganidan keyingi 30 kun ichida Ukraina hududiga 4776 dron uchirilgan. Bu avvalgi 30 kunlik davrga nisbatan 1,5 barobar ko‘p.
The Moscow Times manbalari avvalroq ma’lum qilganidek, Putin hali ham urushda maksimalistik maqsadlarni saqlab qolmoqda. Unga yaqin manbalarning aytishicha, Rossiya prezidenti AQSh bilan muzokaralarda Ukraina tarkibidagi to‘rtta oblast — Donetsk, Luhansk, Zaporijjya va Xersonni ularning to‘liq ma’muriy chegaralari bilan Rossiya nazoratiga o‘tishini talab qilmoqda. Holbuki, ayni paytda bu hududlardan hech biri to‘liq Rossiya armiyasi nazoratida emas.
Mavzuga oid

08:51
Rossiya Kriviy Rigga yana zarba berdi: kamida 19 kishi halok bo‘ldi

08:38
Jinoyat sodir etib, qochib yurgan o‘zbekistonlik Rossiyada ushlandi

08:28
Yevropa va Kanada Putindan AQSh taklifiga darhol javob berishni talab qilmoqda

00:50