Jahon | 09:27
2099
2 daqiqa o‘qiladi

Zelenskiy: Tinchlikparvarlik missiyasini ishchi guruhlar tayyorlaydi

Ukraina, Buyuk Britaniya va Fransiya Bosh shtab boshliqlari darajasida o‘t ochish to‘xtatilgan taqdirda tinchlikparvar kuchlarni joylashtirish masalasi muhokama qilindi. Ishchi guruhlar har hafta maslahatlashuvlarni davom ettiradi, dedi Zelenskiy.

Foto: AFP

Maxsus ishchi guruhlar Ukraina va Rossiya o‘rtasida tegishli kelishuv tuzilganidan keyin o‘t ochishni to‘xtatish rejimiga rioya etilishini ta’minlash vazifasi yuklatilgan xalqaro tinchlikparvar kuchlarni yaratish mexanizmini ishlab chiqadi. Bu guruhlar, Ukraina prezidenti Volodimir Zelenskiy 4 aprel, juma kuni Kiyevda Fransiya va Buyuk Britaniya qurolli kuchlari bosh shtabi boshliqlari bilan uchrashuvdan so‘ng ma’lum qilganidek, haftalik asosda ishlaydi. «Qayerda, qaysi joylarda — bu alohida muhokama qilinadi», deya qo‘shimcha qildi u.

Zelenskiy bir oy ichida tinchlikparvar kuchlarning «missiya infratuzilmasi tushunilishini» kutayotganini aytdi. «Biz yerda, osmonda va dengizda mavjudlik, shuningdek, havo hujumidan mudofaa masalalarini muhokama qilmoqdamiz. Va boshqa nozik narsalarni ham», — deya qayd etdi Ukraina prezidenti. Unga ko‘ra, 4 aprel kuni bo‘lib o‘tgan yig‘ilishda Ukraina tomonidan Ukraina Qurolli kuchlari bosh qo‘mondoni Aleksandr Sirskiy, Ukraina Qurolli kuchlari Bosh shtabi boshlig‘i Andrey Gnatov, prezident devoni rahbari o‘rinbosari Pavlo Palisa va mamlakat mudofaa vaziri o‘rinbosari Yevgeniy Moysyuk ishtirok etgan.

Volodimir Zelenskiy Ukrainaga tinchlikparvar kuchlarni yuborish rejasini muhokama qilishda Fransiya va Buyuk Britaniyadan tashqari «ko‘plab boshqa davlatlar» ham ishtirok etayotganini ta’kidladi.  «Raqamni hozircha aytmoqchi emasman, bu koalitsiya bo‘ladi», dedi u jurnalistlarga.

Mavzuga oid