AQShda Tramp va Maskka qarshi ommaviy norozilik namoyishlari bo‘lib o‘tdi - fotolar

5 aprel kuni Amerikaning barcha 50 ta shtatida prezident Donald Tramp siyosatiga qarshi miting va namoyishlar o‘tkazildi. Tashkilotchilari orasida kasaba uyushmalari, huquq faollari, fuqarolik huquqlari muhofazasi sohasidagi birlashmalar bo‘lgan namoyishlar «Qo‘lingni tort!» shiori ostida birlashdi. Associated Press qayd etishicha, mitinglar tinch ruhda o‘tgan, qo‘lga olinganlar haqida xabarlar kelib tushmagan. Trampga qarshi bu kabi norozilik aksiyalari u prezidentlikka qaytgan kunlarda ham bo‘lib o‘tgandi. Ammo ular hozirgi kabi ommaviy tus olmagandi. CNN ma’lumotiga ko‘ra, Qo‘shma Shtatlar bo‘ylab jami 1400 ga yaqin aksiya uyushtirildi. Palm-Bich shahrida, Trampning qarorgohi yaqinida ham yuzlab kishilar namoyishga chiqqan. Oq uy prezident Tramp shanba kuni o‘z qarorgohida golf o‘ynagani va «yakshanba kuni ham shu ish bilan shug‘ullanmoqchiligi»ni xabar qilgan. «Meduza» namoyishlar vaqtida olingan fotosuratlarni jamladi.

Los-Anjyeles

Namoyishlar butun mamlakat bo‘ylab Manhetten markazidan Alyaskadagi Ankorij shahrigacha bo‘lgan shaharlarda bo‘lib o‘tdi. Xususan, Sietlda namoyishchilar «Oligarxiyaga qarshi kurash» plakatlarini ko‘tarib chiqishdi. Portlend, Oregon, Los-Anjyeles ko‘chalarida ko‘p sonli aksiyalar bo‘lib o‘tdi. Bostonda namoyishchilar «Demokratiyamizdan qo‘lingni tort» va «Ijtimoiy ta’minotdan qo‘lingni tort» yozuvli plakatlarini, Los-Anjyelesda «Ta’limdan qo‘lingni tort», «Qarshilik ko‘rsat» kabi so‘zlar tushirilgan plakatlarini ko‘tarishgan.

Namoyishchilar Tramp va uning eng yaqin maslahatchisi Ilon Maskning minglab federal xizmatchilarni qisqartirish, muhojirlarni deportatsiya qilish, transgenderlar himoyasini zaiflashtirish, ijtimoiy dasturlarni, jumladan, sog‘liqni saqlashni moliyalashtirishni qisqartirish bo‘yicha harakatlarini qoraladi.

Nyu York 

San-Fransisko

Santa-Barbara

Tampa

Dallas

Vashington

Vashingtondagi mitingda Demokratik partiyadan kongress a’zolari ishtirok etdi, ularning ba’zilari namoyishda chiqish qildi. «Bizning asoschilarimiz „Biz, diktatorlar“ so‘zlari bilan emas, balki „Biz, xalq“ so‘zlari bilan boshlanadigan Konstitutsiyani yozgan», – dedi Demokratik partiyadan kongressmen Jyeymi Raskin.

Bundan tashqari, aksiyada Human Righs Campaign inson huquqlari tashkiloti rahbari Kelli Robinson so‘zga chiqib, Oq uyning ozchiliklar hamjamiyatiga nisbatan siyosatini tanqid qildi. «Biz kuzatayotgan hujumlar faqat siyosiy xarakterga ega emas. Ular shaxsiy xarakterga ega. Ular kitoblarimizni taqiqlashga urinmoqda, OIV profilaktikasi uchun mablag‘larni qisqartirmoqda, shifokorlarimizni, o‘qituvchilarimizni, oilamizni va hayotimizni jinoiy javobgarlikka tortmoqda. Biz bunday Amerikani xohlamaymiz. Biz qadr-qimmat, xavfsizlik va erkinlik ba’zilarimizga emas, balki barchamizga tegishli bo‘lgan Amerikani istaymiz», – deya uning so‘zlarini keltiradi Associated Press.