Tramp bojlar AQShga muammo keltirishi mumkinligini tan oldi

Shunga qaramay, Trampning ta’kidlashicha, o‘tish davrida yo‘qotishlar bo‘ladi, muammolar ham bo‘ladi, ammo pirovard natijada hammasi ajoyib bo‘ladi.

«Biz uzoq yillar ilgari amalga oshirilishi kerak bo‘lgan ishni qayta boshlayapmiz. Biz buni nazoratsiz qoldirdik va ayrim davlatlarga bizning hisobimizdan boyish imkonini berdik», — degan Tramp.

U bunday holatni yana takrorlashga yo‘l qo‘ymasligini ta’kidladi. Trampning aytishicha, yangi bojlar joriy etilgandan so‘ng, AQSh kuniga taxminan 3,5 mlrd dollar ishlayapti.

Tramp bundan oldin 75 dan ortiq davlatlar savdo bo‘yicha murosalar haqida muzokaralarga tayyor ekanini ma’lum qilgan edi. Unga ko‘ra, ushbu davlatlar uning «jiddiy tavsiyasi»ga quloq tutgan holda javob choralaridan voz kechgan. Shu sababli ularga nisbatan 50 foizgacha yetishi mumkin bo‘lgan yuqori bojlar o‘rniga vaqtincha 10 foizlik stavka qo‘llanadi. Trampning ta’kidlashicha, u «zarar yetkazish lozim bo‘lmagan va muzokara olib borishni istovchi» davlatlarga zarar yetkazmoqchi emas.

Shu sababli u barcha davlatlar uchun import bojlarining oshirilishini 90 kunga to‘xtatib turish to‘g‘risida qaror chiqardi, faqatgina Xitoydan tashqari.

Shu hafta boshida Tramp Xitoydan keladigan importga jami 104 foizga teng bojlar joriy etdi. Buning ortidan Pekin AQSh tovarlariga bojlarni 84 foizgacha oshirdi. Javob tariqasida Tramp Xitoyga nisbatan bojlarni 125 foizgacha ko‘tardi.

Keyinchalik Oq uyda aniqlanishicha, Xitoy uchun bojlar stavkasi «amalda 145 foizni» tashkil qilmoqda: bu stavka boshlang‘ich 10 foiz, fentanil narkotigi yetkazib berishga ko‘makda ayblovlar bilan bog‘liq yana 10 foiz va javob tariqasida joriy etilgan 125 foizlik bojlardan iborat.

Pekin esa bunday vaziyatda «qo‘l qovushtirib o‘tirmasligini» va Vashington bilan boj urushida ishtirok etishdan qo‘rqmasligini ma’lum qildi.