Tramp davrida federal budjet xarajatlari 154 mlrd dollarga oshdi

Donald Tramp prezidentlik lavozimiga kirishganidan beri AQShning budjet xarajatlari o‘tgan yilning mos davriga nisbatan 154 milliard dollarga oshdi. Bu haqda Moliya vazirligining kunlik hisobotlarini tahlil qilgan The Wall Street Journal xabar berdi.

Qayd etilishicha, ijtimoiy ta’minot dasturlariga xarajatlar 32,7 milliard dollarga, Medicare va Medicaid sog‘liqni saqlash dasturlariga esa ajratiladigan mablag‘lar 29 milliard dollarga oshgan. Bundan tashqari, davlat qarzi bo‘yicha to‘lovlar 25,5 milliard dollarga ko‘paygan. Federal xizmatchilar ish haqiga esa Hukumat samaradorligi departamenti (DOGE) talabi bilan xodimlar soni sezilarli qisqartirilganiga qaramay, 2,8 milliard dollarga ko‘proq mablag‘ sarflangan.

Haqiqiy xarajat qisqarishi faqat ayrim yo‘nalishlarda kuzatilgan. Masalan, Transport xavfsizligi boshqarmasi yangi formalar xarididan voz kechish, safarlar va o‘quv xarajatlarini kamaytirish hisobiga 22 million dollarga kamroq mablag‘ sarflagan. Ta’lim vazirligi xarajatlari 4 milliard dollarga qisqartirilgan. AQSh Xalqaro taraqqiyot agentligi (USAID) dasturlari deyarli to‘liq yopilgan, bu 2024 yil boshiga nisbatan xarajatlarni ikki baravarga kamaytirgan. Biroq keyinchalik bu dasturlar qayta tiklana boshladi va xarajatlar deyarli 2024 yil darajasiga qaytgan.

Federal budjet xarajatlari Ilon Mask hamda u rahbarlik qilayotgan Hukumat samaradorligi departamenti faoliyatiga qaramay oshib bormoqda. Mask va Tramp DOGE «byurokratiyani yo‘q qilishi»ni va’da qilgan. Ushbu departament Amerika hukumati faoliyatining samardorligini oshirishi va bir yarim yildan keyin tugatilishi kerak.