«Do‘stlik» postidagi katta tirbandlikdan aholi ham, tashuvchilar ham norozi – prezident

Ayni vaqtda O‘zbekiston prezidenti Shavkat Mirziyoyev Andijon viloyatini kompleks rivojlantirish bo‘yicha ustuvor vazifalar yuzasidan yig‘ilish o‘tkazmoqda.

Yig‘ilishda ma’lum qilinishicha, har yili Andijondan Qirg‘izistonga 200 million dollarlik eksport amalga oshirilmoqda. Shu sababli, Qo‘rg‘ontepa va Xo‘jaobodda ham xuddi Afg‘oniston chegarasidagi kabi erkin savdo va sanoat zonalari tashkil etish muhimligi ta’kidlandi. Mutasaddilarga tadbirkorlar bilan maslahatlashgan holda ushbu ikkita hududdan bittasini tanlab, master-reja ishlab chiqish topshirildi.

Yig‘ilishda Farg‘ona vodiysidagi eng yirik bojxona postlaridan biridagi vaziyatga to‘xtalib o‘tildi.

«Xo‘jaoboddagi «Do‘stlik» postidagi katta tirbandlikdan aholi ham, tashuvchilar ham norozi ekaniga e’tibor qaratildi. Mas’ul vazirlik va idoralar oldiga tirbandlik sababini o‘rganib, tez fursatda buning yechimi bo‘yicha taklif berish vazifasi qo‘yildi», deyiladi prezident matbuot xizmati xabarida.

«O‘zbekiston-Qirg‘iziston-Xitoy» temiryo‘lini qurish bo‘yicha yirik loyiha ishga tushishi natijasida tashish muddati 1 haftaga, masofasi 1 ming kilometrga qisqaradi, yuk tashish 10 barobar oshadi.

«Lekin, ichki temiryo‘l tarmoqlarimiz, bojxona punktlari, stansiyalar bu yukni qabul qilish va o‘tkazishga qanchalik tayyor?», — degan davlat rahbari.

Mutasaddilarga bu boradagi hisob-kitoblarni qilib, amalga oshiriladigan ishlar bo‘yicha dastur tayyorlash topshirildi.