AQSh kompaniyasi O‘zbekiston Milliy investitsiya jamg‘armasini boshqarishga kirishdi

Amerikaning Franklin Templeton investitsiya kompaniyasi O‘zbekiston Respublikasi Milliy investitsiya jamg‘armasini (UzNIF) rasman boshqarishga kirishdi. Uning ustuvor vazifalaridan biri UzNIF aksiyalarini Toshkent fond birjasi va yetakchi xalqaro platformalarda joylashtirishga tayyorgarlik ko‘rish bo‘ladi.

UzNIF iqtisodiy o‘sishni rag‘batlantirish, xalqaro investitsiyalarni jalb qilish va mamlakat kapital bozorini rivojlantirish maqsadida prezidentining 2024 yil 27 avgustdagi qarori bilan tashkil etilgan bo‘lib, 18 ta asosiy davlat korxonasi, jumladan, banklar va yirik sanoat kompaniyalarining 20 foizdan 40 foizgacha minoritar ulushlariga ega. Jamg‘arma aktivlarining umumiy qiymati 1,68 milliard dollarga baholanmoqda. Davlat ushbu jamg‘armaning yagona aksiyadori hisoblanadi.

UzNIF boshqaruviga o‘tkazilgan davlat korxonalari va ularning mol-mulkidagi ulushlari ro‘yxati:

- «Navoiyazot», 25%;

- «Hududiy elektr tarmoqlari», 40%;

- «Issiqlik elektr stansiyalari», 25%;

- «Xalq banki», 30%;

- «O‘zbekgidroenergo», 20%;

- Mikrokreditbank, 40%;

- «O‘zbektelekom», 25%;

- «Tadbirkorlikni rivojlantirish banki», 25%;

- «O‘zbekiston havo yo‘llari», 25%;

- Uzbekistan Airports, 25%;

- «Temiryo‘linfratuzilma», 25%;

- «Hududgazta’minot», 40%;

- «Toshshahartransxizmat», 25%;

- «O‘zbekiston pochtasi», 25%;

- «O‘zbekiston milliy elektr tarmoqlari», 40%;

- «O‘zbekiston Respublika tovar-xomashyo birjasi», 40%;

- «O‘zbekinvest», 20%;

- «O‘zsuvta’minot», 40%.

Franklin Templeton 1947 yilda Nyu-Yorkda tashkil etilgan va dunyodagi eng yirik aktivlarni boshqarish kompaniyalaridan biridir. Kompaniya 1,4 trillion dollardan ortiq qiymatdagi aktivlarni boshqaradi, 30 dan ortiq mamlakatlarda ishlaydi va butun dunyo bo‘ylab mijozlarga xizmat ko‘rsatadi. Kompaniya rivojlanayotgan mamlakatlarda shunga o‘xshash jamg‘armalarni boshqarishda katta tajribaga ega ekanligini ta’kidlaydi.